Zgjedhje të reja për shkak të Speciales

Autori:Avdyl Pajaziti

Funksionalizimi i Gjykatës Speciale do të ketë ndikim të madh në skenën politike në vend, vlerësojnë analistët politikë.

Analistët politikë parashohin zgjedhje të reja në fillim të vitit të ardhshëm dhe ndryshime të mëdha në skenën politike pas funksionalizimit të Gjykatës Speciale. Këto ndryshime, ata i shohin në varësi të asaj se kush do të jenë në fokus të Gjykatës Speciale.

Analisti Artan Muhaxhiri vlerëson se Gjykata Speciale do të ketë ndikim të madh në spektrin politik, por sipas tij, pesha e këtij ndikimi do të varet nga rëndësia partiake e personave që do të akuzohen.

“Nëse do të akuzohen disa nga udhëheqësit e PDK-së, është e absolutisht e sigurtë se do të kemi zgjedhje të reja, sepse koalicioni aktual PDK-LDK, nuk mund të vazhdojë nëse do të mungojnë disa nga politikanët kryesorë të cilët edhe e kanë krijuar atë”, tha Muhaxhiri për Radio Kosovën.

Në rast se Gjykata Speciale ngrit aktakuza ndaj figurave kryesore të PDK-së, dhe do të vazhdonte koalicioni PDK-LDK, analisti Imer Mushkolaj thotë se kjo do të ishte humbje e madhe për vendin.

“Nëse do të ndodhë një gjë e tillë do të kthehemi në situatën e vitit 2005 kur Haradinaj udhëtoi drejt Hagës dhe ne e dimë pastaj se çfarë palaço koalicioni mbeti atë kohë nën udhëheqjen e zyrtarëve të tjerë të AAK-së”, tha Mushkolaj për Radio Kosovën.

Ndërkohë, kreu i AAK-së, Ramush Haradinaj ka kërkuar që vendi të shkojë në zgjedhje të parakohshme në vjeshtë. Analisti Imer Mushkolaj shprehet skeptik se zgjedhjet mund të mbahen brenda këtij viti, por ai nuk e përjashton mundësinë që ato të mbahen në fillim të vitit të ardhshëm.

“Besoj se në vitin e ardhshëm do të kemi zgjedhje, por prapë po them, varet shumë rrjedha e funksionalizimit të Gjykatës Speciale”, tha Mushkolaj.

Funksionalizimi i Gjykatës Speciale, sipas analistit Artan Muhaxhiri do ta vendos PDK-në në një pozicion të pafavorshëm karshi LDK-së në koalicionin qeverisës. Por edhe nëse shkohet në zgjedhje, PDK-ja, sipas tij, prapë do të jetë në disfavor nëse Gjykata Speciale ngrit aktakuza ndaj krerëve të kësaj partie.

Sidoqoftë, sipas Muhaxhirit, nëse shkohet në zgjedhje, PDK-ja do ta përdorë kartën e viktimizimit.

“PDK-ja do të tentojë të paraqitet si një viktimë e Gjykatës Speciale dhe si një parti e cila është e mbrojtur Kosovën nga akuzat e padrejta”, tha Muhaxhiri.

Ndryshe, pas vendimit të Kuvendit për themelimin e Gjykatës Speciale, janë përmendur emra të shumtë si të akuzuar të mundshëm të kësaj gjykate, mes të cilëve edhe krerët e Partisë Demokratike të Kosovës dhe disa figura politike nga subjektet tjera./RTK

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/zgjedhje-te-reja-per-shkak-te-speciales/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala