Ymeri: Fajin për korrupsion e paska populli!

Autori:Avdyl Pajaziti

Kryetari i Lëvizjes Vetëvendosje, Visar Ymeri, nëpërmjet një postimi në Facebook ka vlerësuar se krerët e institucioneve kosovare, nuk e kanë kredibilitetin e nevojshëm për të denoncuar korrupsionin dhe as për ta vlerësuar nivelin e heroizmit e patriotizmit.

Sipas Ymerit korrupsionin e kemi të ulur “këmbëkryq në institucione për shkak të imoralitetit, si mungesë të kritereve morale, qyqarllëkut, si mungesë heroizmit shoqëror, dhe tradhtisë, si mungesë patriotizmi”.

Ja postimi i plotë:

Krokodilët paskan filluar të qajnë prapë!

Krerët e shtetit të kapur, që njëkohësisht janë krerët e kapjes së shtetit, e paskan vlerësuar sot në nivel heroizmi e patriotizmi të skajshëm denoncimin e korrupsionit (Jahjaga e Veseli). Për më tepër kryeministri paska thënë që korrupsioni na qenka rezultat i moskrijimit të kritereve morale e ligjore në shoqëri!

E kur t’i bëjmë bashkë këto qëndrime institucionale na del se korrupsionin e kemi të ulur këmbëkryq në institucione për shkak të imoralitetit (si mungesë të kritereve morale), qyqarllëkut (si mungesë heroizmit) shoqëror, dhe tradhëtisë (si mungesë patriotizmi) së shoqërisë ndaj të mirë së përgjithshme. Na del që fajin për nivelin flagrant të korrupsionit politik, ekonomik e financiar e paska populli!

Por çdo gjë qartësohet kur e kupton se kush po flet:

Kadri Veseli, që erdhi në Kuvend nga karrika e shefit të ShIK-ut, përmes të cilit tash e 16 vjet e zhvatë pasurinë e paranë publike të këtij populli, duke ecur tutje me kapjen totale të shtetit dhe vënie të tij në funksion të interesave (të cilat ai po i quajka karamele) të bashkëpartiakëve e bashkë’inteligjentëve’.

Isa Mustafa, që bëri krimin më të madh urban që kishte parë Kosova, dhe atë në Prishtinë, duke iu krijuar hapësirë për keqpërdorim të hapësirës e uzurpim të pronës publike mafias së ndërtimit, krim ky një pjesë e të cilit është dokumentuar në mbi 70 dosjet e dërguara në prokurori,

Hashim Thaçi, i cili drejtoi qeverinë e Kosovës për 7 vjet rresht, gjatë së cilës secila ndërmarrje publike e Kosovës u vu përballë rrënimit të plotë për t’i shitur lirë e shpejtë, ndërkohë që Buxheti i vendit u katandis si mos më keq duke paguar Bechtel Enkën shtrenjtë e shpejtë,

Atifete Jahjaga, e cila erdhi në Presidencë nga zarfi i Christopher Dellit të Bechtelit, zarf ky që u hap dhe mirëprit nga Thaçi, Mustafa dhe Pacolli.

Kriminelët ordinerë, fajdexhinjtë dhe trafikantët janë të lirë nëpër rrugë dhe nxiten të ndërmarrin veprime kundër opozitës, ndërsa policia përdoret për të ndalur protesta e peticione.

Të tashmen e këtij vendi dhe këtij populli e keni plagosur rëndë. Tash duket se jeni përqendruar në ofendimin e përditshëm të po këtij populli. (sic)

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/ymeri-fajin-per-korrupsion-e-paska-populli/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala