Vrasësi i Enver Zymberit shëtit lirshëm në veri të Kosovës

Autori:Avdyl Pajaziti

Edhe pak ditë dhe mbushen 4 vjet nga vrasja e Enver Zymberit, e vrasësit (apo vrasësi), nuk janë asgjëkundi pas hekurave. Përkundrazi, dikush që dyshohet si i morri jetën policit të Kosovës bredh lirshëm, ngjashëm si shumë të kërkuar të tjerë për krime në veri të Kosovës.

Dhe ai është Dushan Jovanoviç,  personi që dyshohet për vrasjen e policit të njësisë speciale të Kosovës ROSU, Enver Zymberit, për të cilin ka një urdhërarrest ndërkombëtar dhe vendor,  por që shëtit lirshëm në veri të Kosovës.

Jovanoviç këto ditë po qëndron në vendlindjen e tij në Zubin Potok, ndërsa vapën e madhe që po mbretëron është duke e shuar në liqenin e Gazivodës.

Portali ‘tesheshi’ ka arritur të sigurojë një foto të bërë më 8 korrik, pra një javë më parë, ku Dushan Jovanoviç shihet në shoqëri e të vëllait në këtë liqen që ndodhet në veriun e Kosovës.

IMG_6250

Për qëndrimin e shumë të kërkuarit, pra për vendodhjen e tij, janë në dijeni si EULEX-i e si Policia e Kosovës në Zubin Potok, por që nuk arrijnë ta prangosin.

“Ai është hero serb, ka vrarë një pjesëtar të Policisë së Kosovës të njësisë speciale ROSU – shqiptar – dhe për këtë ai është hero serb, por që nuk trazohet nga policia e Kosovës e stacionit të Zubin Potokut”, ka thënë një burim i portalit ‘tesheshi’, me kusht të anonimitetit, i cili ka mundur të sigurojë dhe fotot përkatëse.

“Jovanoviç është parë në shoqëri edhe të policëve të Kosovës të komunitetit serb, por ata nuk e arrestojnë e as nuk e lajmërojnë në komandën rajonale të Policisë në veri, e as tek EULEX-i”, ka thënë burimi.

Sipas tij, më 26 korrik 2011, Dushan Jovanoviq ka qenë pjesëmarrës në grupin e serbëve, të cilët me makina kanë ndaluar njësinë speciale të Kosovës ROSU në fshatin Varag, ku pas shkëmbimit të zjarrit ka mbetur i vrarë Enver Zymberi, pjesëtar i ROSU-së.

Dhe burimi vijon duke deklaruar se Jovanoviç, këto ditë të qëndrimit të tij në Zubin Potok, është parë në shoqëri të disa pjesëtarëve të Policisë së Kosovës si dhe të zyrtarëve më të lartë të kësaj komune.

“Jovanoviç dhe i dyshuari tjetër për vrasjen e Enver Zymberit, Ratomir Bozhoviq, që gjenden në arrati, mbrohen nga institucionet e Kosovës, përkatësisht komuna e Zubin Potokut”, ka thënë burimi për portalin ‘tesheshi.com’. (Edhe pse është komunë me shumicë serbe, ajo konsiderohet si institucion i Kosovës).  

Për më tepër, sipas burimit, komuna e Zubin Potokut përmes disa llogarive sekrete, për çdo muaj në llogari të Jovanoviçit dhe Bozhoviçit derdh nga 30.000 dinarë, pra 250 euro për pagesë të qirasë.

IMG_6253

“Jovanoviç gjithashtu është i njohur për policinë e Serbisë, për vendin ku jeton, por shteti serb nuk do ta arrestojë dhe ta ekstradojë atë në Kosovë, pa një trysni të madhe ndërkombëtarë”, ka thënë burimi i portalit, që sqaron sen Dushan Jovanoviç, që pas vrasjes së Enver Zymberit, jeton në Beogradin e Ri dhe punon roje sigurie në disa lokale shumë të njohura të kryeqytetit serb.

Në anën tjetër, zyrtarë të policisë së Kosovës për rajonin Veri, i kanë thënë portalit ‘tesheshi’ se: “Policia e Kosovës nuk ka asnjë informacion për vendndodhjen e Dushan Jovanoviçit, por po të dinin se ai gjendet në Kosovë, menjëherë do të reagonin dhe do ta arrestonin, pasiqë ndaj tij ka një urdhërarresti ndërkombëtar”.(Portali tesheshi.com, u jep një dorë ndihme me informacionin që po përcjell, bashkangjitur fotove, për vendndodhjen e Jovanoviçit)

 “Ne kemi arrestuar 4 personat e tjerë që kanë qenë të dyshimtë, por të gjithë janë liruar nga gjykata për mungesë të provave”, ka thënë një burim tjetër i portalit ‘tesheshi’ nga Policia e Kosovës.

Sipas tij, janë bërë shumë gabime nga ana e policisë gjatë zhvillimit të hetimeve në vendin e ngjarjes dhe tani kjo po  kushton me lirimin e njerëzve të dyshuar që kanë marrë pjesë në sulmin ndajë policisë dhe në vrasjen e pjesëtarit të ROSU-së, Enver Zymberit.

Policia e Kosovës pas vrasjes së Enver Zymberit, Gjykata e Mitrovicës, patë shpall në kërkim 6 veta, të gjithë nga rajoni i Kollashinit të Zubin Potokut: Ratomir Bozhoviç i njohur si ‘Dude’, Radovan Radiç, Milovan Vlashkoviç, Slobodan Vuçiniç, Dushan Jovanoviç dhe Ratomir Kasaleviç.

Momentalisht, nga të gjithë në arrati ende mbeten Dushan Jovanoviç dhe Ratomir Bozhoviç. Të tjerët kanë dalë para drejtësisë dhe në mungesë të provave janë liruar./tesheshi.com/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/vrasesi-i-enver-zymberit-shetit-lirshem-ne-veri-te-kosoves/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala