Veturat e përdorura: Të mira për buxhet, të dëmshme për qytetarët

Autori:Avdyl Pajaziti

Për katër vite në Kosovë kanë hyrë mbi 71 mijë vetura të vjetra nga e gjitha vendet e Evropës. Ato më shumë kanë rrezikuar jetën e qytetarëve se sa që u është parë hajri.

Kështu u vlerësua në konferencën e së premtes të organizuar nga Instituti për Studime të Avancuara GAP, për ndikimin dhe efektet e vendimit të Qeverisë së Kosovës të vitit 2011 që të lejohet importimi i veturave të cilat janë të përdorura deri në 13 vite, nga 8 sa ishte gjatë viteve të kaluara.

Rritja e numrit të aksidenteve si dhe ndotja e ambientit janë disa nga efektet negative të këtij vendimi.

Ministri i Mjedisit dhe Planifikimit Hapësinor, Ferid Agani, tha se 60 për qind e sëmundjeve në Kosovë janë sëmundje nga ajri, dhe se vendimi i Qeverisë është marrë për të mirën e ekonomisë. Ndërkaq, udhëzuesit për përdorimin e veturave të përdorura, nuk janë zbatuar nga ana e qytetarëve.

“Tani është duke u punuar në përpunimin e këtij udhëzuesi, dhe jemi në draftin e fundit para se të dorëzohet në Qeveri për impelentim. Ky udhëzues së pari do të diskutohet me shoqërinë civile pastaj do të implementohet”, u shpreh Agani.

Ndërkaq, Drejtori Gjeneral i Institutit GAP, Agron Demi, tha se ky vendim i qeverisë është i gabuar, pasi që pasojat e saj janë në efekte afatgjate.

“Ky vendim i Qeverisë së Kosovës për mbushjen e buxhetit të Kosovës me uljen e vitit të veturave të përdorura është politikë e gabuar, sepse efektet negative të saj po shihen në nivel afatgjatë, ndërsa qeveria po shikon në atë afatshkurtër”, tha Demi.

Edhe Sheremet Ahmeti, nga Policia e Kosovës, u shpreh i shqetësuar rreth aksidenteve që po ndodhin muajt e fundit në Kosovë, dhe tha se është krijuar gjendje alarmante. Ahmeti tregoi se në muajin tetor të vitit të kaluar janë shkaktuar 4 aksidente gjithsej, ndërsa në tetor të këtij viti  deri tani janë shkaktuar 8 sosh.

“Është krijuar gjendje alarmante. Krahasuar shifrat e vitit të kaluar me të këtij viti ato janë rritur në mënyrë drastike”,u shpreh Ahmeti.

Ardian Gojani, profesor në Universitetin “UBT”, tha se ky vendim i Qeverisë është i pamatur, dhe se këtij vendimi po i vërehen efektet negative.

“Vendimi i Qeverisë për uljen e viteve të veturave të përdorura mund të themi se është i pamatur, dhe se kjo po prodhon 2 efekte negative. Efekti i parë negativ është se me vjetërsinë e veturave rritet ndotja e ambientit dhe zhurma e tyre, dhe gjithashtu rritet intensiteti i trafikut”, tha ai./Gazeta Fjala/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/veturat-e-perdorura-te-mira-per-ekonomi-te-demshme-per-qytetaret/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala