Vetëvendosje krahason Policinë e Kosovës me atë të Miloshevicit

Autori:Avdyl Pajaziti

Lëvizja Vetëvendosje në një Konferencë për Media të mbajtur të dielën e ka krahasuar Policinë e Kosovës me atë të Miloshevicit.

“Sipas informacioneve nga qytetarët, dhjetëra personave u janë bastisur shtëpitë dhe janë arrestuar duke ushtruar dhunë mbi ta, qoftë gjatë arrestimit apo në stacione policore. Kjo i ngjan dhunës në protestat e paraluftës”, ka thënë Frashër Krasniqi, aktivist i kësj partie.

Spas Vetëvendosjes dhuna e Policisë së Kosovës është duke vazhduar edhe sot, 5 ditë pas protestës. “Kjo nuk po e zmbrapsë popullin, sepse nga informatat nga terreni, populli është edhe më i mobilizuar sesa në dy protestat e kaluara, për të protestuar të mërkurën”, ka thënë Krasniqi.
Ndërkaq, Visar Ymeri tha se kjo dhunë e Policisë është dëshmi e panikut të Qeverisë. “Qeveria është në panik, e frikësuar dhe tani e kemi një situatë kur të frikësuarit po tentojnë t’i frikësojnë qytetarët”, tha Ymeri, duke konstatuar se Isa Mustafa dhe Hashim Thaçi janë të frikësuar të përballen me Jabllanoviqin dhe Serbinë e të ndërmarrin veprime sovranizuese për shtetin e Kosovës.
Duke iu referuar dhunës së Policisë ndaj qytetarëve, Visar Ymeri tërhoqi vërejtjen se deri më tash asnjë polic nuk është raportuar apo hetuar për sjelljet e tyre brutale, dëshmitarë të së cilës janë të gjithë. Ai kërkoi nga Policia që t’i bëjë publikë emrat e të gjithë të arrestuarve dhe arsyet se pse ata po ndiqen dhe po mbahen në paraburgim. Njëkohësisht Ymeri iu bëri thirrje të gjitha organizatave vendore e ndërkombëtare për të drejtat e njeriut, që të veprojnë, hulumtojnë dhe reagojnë karshi kësaj përndjekjeje policore dhe politike.
Në fund Visar Ymeri porositi se Qeveria e Kosovës dhe Isa Mustafa i kanë dy ditë që t’i plotësojnë kërkesat e protestës. “Isa Mustafa e Hashim Thaçi i kanë dy alternativa: Ose të ballafaqohen me Serbinë, që ta jetësojnë Republikën e Kosovës, ose do të ballafaqohen me qytetarët e bashkuar në protestë, në mënyrë që burimi i sovranitetit të jetë edhe ushtrim i sovranitetit, nëpërmjet protestës”, ka thënë Ymeri, i cili pritet të jetë shumë shpejtë edhe kryetar i kësaj partie.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/vetevendosje-krahason-policine-e-kosoves-me-ate-te-miloshevicit/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala