Tregu i telefonisë në rënie

Autori:Zekirja Shabani

Mungesa e investimeve, kufizimi i tyre me vendime qeveritare, mospërcjellja e zhvillimeve në treg, rritja e shpenzimeve, posacërisht për stafin, domosdoja e përshtatjes së tarifave dhe të kostos së shërbimeve me konkurrencën, keqmenaxhimi dhe mungesa e konsistencës, kanë rezultuar me dobësimin e bazës materiale, që do të thotë edhe fitmit.

Kështu e vlerëson gjendjen në Postën dhe Telekomin e Kosovës, Qendra për Hulumtime Strategjike e Sociale-STRAS, në rapoortin e fundit për zhvillimet në tregun e telekomunikacionit.

Sipas të dhënave që ka prezantuar STRAS, tregu i telefonisë mobile nga 199 milionë euro që ishte në 2011, ka rënë për më shumë se 50 milionë euro, në rreth 140 milionë euro.

“Tregu është në rënie. E vetmja pjesë e ndritur mbetet tregu i internetit që ka filluar”, ka thënë drejtori ekzekutiv i STRAS-it, Ibrahim Rexhepi.

Sipas tij, krahas tregut ka rënë edhe PTK-ja.

“PTK në vitin 2011 arriti kulmin, për të filluar rënien. Kjo rënie ndodhi sepse Qeveria nuk ka vizion të qartë për zhvillimin e kompanisë, PTK u bllokua në dy procese të dështuara të privatizimit. Investimet u bllokuan dhe kjo gjë që ndikoi keqazi në afarizmin e kompanisë”, tha Ibrahim Rexhepi, duke shtuar se të gjitha këto kanë ndikuar që fitimet e PTK-së të bien nga 60 milionë në 16 milionë euro, kurse të hyrat nga 160 milionë në 99 milionë euro.

Ai po ashtu theksoi se PTK pagoi devidentë në shumën prej mbi 460 milionë euro, dukshëm më shumë se vet fitimet e kompanisë.

Sipas rekomandimeve, Qeveria e Kosovës nuk duhet të preokupohet me privatizimin e kompanisë së paku gjatë këtij mandati, ndërkohë që edhe devidenti të lejohet për t’u riinvestuar, e jo të tërhiqet ende pa u mbyllë viti.

Ai ka kërkuar që ARKEP të veprojë më shpejtë në dhënien e frekuencave.

Ndërkaq, ministri i Zhvillimit Ekonomik, Blerand Stavileci, tha se në tregun e Kosovës po ngjan e njëjta që po ndodhë edhe në pjesë tjera të botës dhe kjo lidhet me rënien e telefonisë fikse mobile.

“Përveç rënieve kemi edhe disa gjëra pozitive në lidhje me internetin dhe depërtueshmërinë e tij. Janë disa projekte si 4G që do t’i japë hapësirë të mirë zhvillimit të këtij sektori”, tha ministri Stavileci, duke shtuar se zhvillimet teknologjike kanë afektuar operatorët në Kosovë.

Ai ka premtuar se qeveria ka edhe obligime dhe shpejt do t’i ndajë frekuencat për dy operatorët kryesorë.

Kryetari i ARKEP-it, tha se edhe Shqipërinë, përdorimi i thirrjeve dhe sms pa para, e ka goditur me rënie prej 17 për qind, Maqedoninë me 11 për qind e kështu me radhë.

“Në BE forca goditëse ka filluar me herët”, tha Ekrem Hoxha, duke shtuar se më datën 22 korrik do merret vendimi për alokimin e brezit frekuencorë.

Sipas tij, do të kenë gjithë resurset për të ofruar kualitet, por njëkohësisht edhe do të mbikëqyren për shërbimet e tyre.

“Jemi gati për t’i mbikëqyrë operatorët për shërbimet që ofrojnë”, tha Hoxha, duke vlerësuar qartësinë e raportit të STRAS-it.

Agron Mustafa, drejtori i PTK-së, duke folur për tregun në regjion, potencoi rastin e bashkimit të operatorëve në Maqedonia dhe Shqipëria, si rrjedhojë e rënies e tregut.

“Mendimi për operatorë të tretë para privatizimit të Vala do ishte goditje për operatorin publik. Do ishte katastrofale dhe i bëjë thirrje politikës mos të mendojë në këtë drejtim”, tha Agron Mustafa.

Sipas tij, është e palogjikshme që disa vite më herë i janë larguar Valës të gjitha kompanitë publike.

Ai ka kritikuar faktet që paret që merren nga Vala, të shkojnë për shërbime në operatorët tjerë.

“Jemi kompani publike, 100 për qind në pronësi publike. Gati 500 milionë Vala ka dhënë në emër të devidentes. Kemi 2.300 punëtorë dhe 20 mijë persona janë të lidhur me Vala”, tha tutje drejtori Mustafa.

“Që prej dy vitesh kërkojmë brezin frekuencorë shtëse. Qe dy vite i kemi paratë të buxhetuara, por nuk e kemi. Do të donim të tregonim forcën tonë. Kjo për shkak se sipas informatave, konkurrenca nuk është gatshme të paguajë. Bëj thirrje publike që sa më shpejt të na japin resurset shtesë”, përfundoi Mustafa.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/tregu-i-telefonise-ne-renie/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala