Trafikantët e drogës, ja si i shpërndanin pakot për klientët “VIP”

Autori:Avdyl Pajaziti

Në mesin e korrikut 2015, në kryeqytet u ndalua një grup shpërndarësish lëndësh narkotike, të cilët shpërndanin kanabis në zonat e njohura të Tiranës dhe për klientë “VIP”.

Ky grup, ndër të tjera, u bë i njohur, edhe pas arrestimit të këngëtarit Cozman (Ylber Abdullahu), i cili u gjet me 20 gram kanabis, të cilin e kishte blerë te ky grup. Të arrestuarit ishin në mbikqyrje nga autoritetet hetimore që prej muajit qershor 2015.

Në përfundim të operacionit u arrit të arrestoheshin në flagrancë shtetasit Marsel Xeba, i dyshuar si organizator i kësaj veprimtarie, si edhe bashkëpunëtorët e dyshuar Ilirjan Xeba dhe Andi Xeba (vëllezërit i tij); Xhuljo Qejvanaj, Noel Papuli, Skerdi Xhelo, Lavdërim Xeba. Fillimisht, Prokuroria e Tiranës ka regjistruar procedimin penal për veprën “prodhim dhe shitje lëndësh narkotike..” në prill 2015, në bazë të informacionit të referuar nga ana e Policisë së Shtetit, transmeton Shekulli.

Në vijim të veprimeve hetimore, në këtë procedim penal u bashkuan edhe disa referime të tjera për persona të ndryshëm, të mbërritura në periudhën qershor-korrik 2015, pasi, në bazë të të dhënave të siguruara, u krijuan dyshimet e arsyeshme se operonin së bashku në shpërndarjen e lëndës narkotike kanabis në zonat kryesore të Tiranës, përfshirë ish-bllokun dhe në lokale të frekuentuar.

Ata janë ndjekur nga policia dhe janë parë që të fshehin lëndën narkotike në matësit e ujit apo të energjisë elektrike në hyrje të pallateve. Nga hetimet e kryera dyshohet se shtetasi i identifikuar me emrin Marsel ushtron aktivitet “shitje të lëndës narkotike të llojit kanabis sativa në Tiranë.

Këtë lëndë ky shtetas dyshohet se e shet në doza të vogla kundrejt shumës një mijë lekë, kryesisht në zonën e “Rrugës së Durrësit”, “Rruga e Barrikadave”, “Shkolla e Kuqe”, “Don Bosko”, “Zogu i Zi” dhe në vende të ndryshme të Tiranës.
Ky shtetas, lëndën narkotike dyshohet se e mban të fshehur në vende të ndryshme si: çantën që mban me vete, ose në automjetin “Ford Fiesta” si dhe dyshohet në banesën e tij te Fusha Aviacionit, po ashtu në hyrjet e pallateve ku shet, në bokset e sahateve të ujit dhe energjisë elektrike.

Ai dyshohet se vepron kryesisht me klientelë fikse, të njohur personalisht nga ana e tij, duke e tregtuar gjatë orëve të ditës dhe në mesditë, po ashtu dhe gjatë fundjavës.

Dyshohet se i merr porositë nëpërmjet telefonit ose verbalisht dhe për të shitur mallin përdor shprehje me nënkuptime si; “telefoni është gati”, “atletet janë gati”. Gjithashtu ai përgjithësisht është i përqendruar në vendin e quajtur “Rruga Durrësit”. Në këtë aktivitet të paligjshëm dyshohet se shtetasi Marsel Xeba bashkëpunon me shtetasit Andi Xeba dhe Ilirjan Xeba (vëllezërit e tij) si dhe shtetasin Skerdi Xhelo.

Nga të gjitha provat e administruara, rezulton se shtetasit Marsel Xeba, Ilirjan Xeba, Andi Xeba, Xhuljo Qejvanaj, Noel Papuli si dhe Skerdi Xhelo, në bashkëpunim ndërmjet tyre, ushtrojnë aktivitetin e paligjshëm të shitjes së lëndës narkotike kanabis sativa, duke e shitur klientëve të ndryshëm (Cosmanit, apo personave të tjerë të paidentifikuar), kundrejt pagesës në lekë apo valutë, duke i ndarë përfitimet me njëri-tjetrin.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/trafikantet-e-droges-ja-si-i-shperndanin-pakot-per-klientet-vip/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala