Thaçi s’ka kundërkandidat

Autori:Avdyl Pajaziti

Zëvendëskryeministri dhe ministri i Punëve të Jashtme, Hashim Thaçi, po pret i qetë që në mars të këtij viti do të zgjidhet presidenti i Kosovës, pa ndonjë vështirësi. Kreu i PDK-së, deri më tani nuk ka kundërkandidat që do ta sfidojë seriozisht për postin e të parit të shtetit.

Kjo, meqë aktualisht presidentja Atifete Jahjaga, nuk ka dhënë shenja se mund të rikandidojë edhe për një mandat, e as partitë opozitare nuk kanë menduar, e as diskutuar për të propozuar një kandidat të përbashkët për president të vendit, shkruan ‘Zëri’.

Ndërsa, ish-kryeministri Thaçi është shprehur se më së largu në përfundim të marsit do të bëhet votimi për president dhe se nuk frikësohet se do të dështojë në këtë proces.

“Nga koalicioni mund të marr rreth 89 vota. Koalicioni është i qëndrueshëm dhe i besoj partnerit me të cilin kam lidhur koalicion. Nuk kam arsye që të vë në dyshim marrëveshjen që kemi. Do t’i qëndrojmë deri në fund besnik kësaj marrëveshjeje të cilën e kemi lidhur në fillim”, ka thënë Thaçi.

Mirëpo, edhe pse ende nuk ka një kandidat zyrtar që do ta sfidonte Thaçin për postin e kreut të shtetit, Kushtetuta në nenin 86, paragrafi 5, obligon që në garë duhet të jenë së paku dy kandidatë, çka do të bëjë që Thaçi ta ketë një kundërkandidat sa për ta plotësuar kriterin formalo-juridik. /Zëri

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/thaci-ska-kunderkandidat/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala