Telenorit serb i refuzohet aplikimi për 4G në Kosovë

Autori:Zekirja Shabani

Kërkesa e kompanisë serbe të telefonisë celulare Telenor për të aplikuar për licencën 4G në Kosovë, është refuzuar nga Autoriteti Rregullativ i Komunikimeve Elektronike dhe Postare të Kosovës (ARKEP).

Më herët ARKEP publikoi një ftesë për operatorët e telefonisë mobile që të aplikonin për t’u pajisur me këtë licencë për marrjen e frekuencave 1800 MHz.

Pas shqyrtimit të kërkesave të paraqitura, ARKEP njoftoi dokumentet e dorëzuara nga operatorët ekzistues të telefonisë së lëvizshme në Kosovë, IPKO Telecommunications dhe PTK, si aplikime nga operatorë të kualifikuar.

Por i njëjti institucion vlerësoi se ofertuesi nga Beogradi, Telenor, nuk i ka përmbushur kriteret për marrje në shfrytëzim të këtyre resurseve.

“Telenor nuk i përmbush kriteret dhe kushtet për marrje në shfrytëzim të resurseve pasi që i njëjti nuk është në posedim të Autorizimit të Përgjithshëm, respektivisht nuk ka kryer dhe respektuar procesin e notifikimit si parakusht ligjor dhe rregullator për aplikim për resurse frekuencore për operime të autorizuara në Republikën e Kosovës”, thuhet në komunikatën e ARKEP-it.

Telenori prezantohet një kompani që është e pranishme në 13 tregje të Europës dhe në Azi, transmeton kallxo.com.

Sipas ARKEP-it në vazhdim të procedurës për ndarjen e resurseve shtesë frekuencore do të njoftohen palët e interesuara dhe publiku.

Frekuenca 4G mundëson shpejtësi tepër të lartë të transmetimit të të dhënave, krahasuar me brezin 3G, dhe shumica e vendeve ofrojnë licenca kundrejt tarifave prej dhjetëra milionë euro për licenca të tilla.

Në Kosovë, e cila zyrtarisht vlerësohet nga banka Botërore si vendi më varfër në Europë, këto licenca janë falas./kallxo.com/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/telenorit-serb-i-refuzohet-aplikimi-per-4g-ne-kosove/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala