Të gatshëm për tregun e punës

Autori:Avdyl Pajaziti

Florentina Krasniqi synon ta realizojë ëndrrën që gjatë gjithë jetës të mos i ndahet shkollës. Rioshja nga Pagarusha e Malishevës ëndërron të bëhet profesoreshë e gjuhës shqipe.

Maturantja ndryshe mendonte në shkollë fillore, kur shpresonte që një ditë ta vishte mantelin e bardhë dhe t’i përvilte mëngët në shërbim të të sëmurëve. Mendjen e ndërroi pasi u regjistrua në drejtimin e mjekësisë në shkollë të mesme. Aty nuk qëndroi gjatë, shkruan sot “Koha Ditore”.

Në klasën e njëmbëdhjetë u transferua në drejtimin administratë dhe shërbime të zyrës në Qendrën e Kompetencës. Nuk jep shumë shpjegime për ndryshimin e ambicieve.

“Këtu janë kushtet më të mira dhe është më lehtë”, thekson Florentina fjalëpakë. Shpreson që ta kalojë testin për pranim në Departamentin e Gjuhës Shqipe në Universitetin e Prishtinës.

“E di se ka shumë mësimdhënës të gjuhës shqipe, por shpresoj se do t’ia dal”, shton Florentina, teksa qëndron në oborrin e shkollës në shpatinën e rrezes së Malit të Goleshit, në anën e djathtë të rrugës Malishevë-Rahovec.

Me standarde evropiane

Shkolla në Malishevë është një prej katër qendrave të kompetencës, të cilat janë ndërtuar me qëllim të krijimit të kuadrove profesionale dhe të kualifikuara për treg.

Planprogrami i këtyre qendrave përbën 60 për qind teori dhe praktikë profesionale, kurse vetëm 40 për qind lëndë të përgjithshme akademike, të cilat mund të bëjnë bazën e një studimi akademik.

Të tjerat janë në Skënderaj, Ferizaj dhe Prizren. Tri prej tyre kanë nisur punën në vitin shkollor 2010/2011, ndërkaq ajo e Prizrenit në shtatorin e vitit të kaluar.

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/te-gatshem-per-tregun-e-punes/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala