Sot vendoset për seancën e radhës

Autori:Avdyl Pajaziti

Kuvendi i Kosovës ka njoftuar se sot do të mbajë mbledhjen e Kryesisë me shefat e grupeve parlamentare, ku përveç tjerash do të diskutohet edhe për përgatitjen e seancës së ardhshme. Megjithatë, ajo çka dihet deri tani është se opozita nuk ka ndërruar qëndrim dhe do të insistojë të mos mbahet asnjë seancë, deri në tërheqjen e marrëveshjes me Serbinë dhe atë me Malin e Zi.

Sipas njoftimit të Kuvendit, në këtë mbledhje të kryesisë do të miratohet procesverbali nga mbledhja e mëparshme, si dhe do të diskutohet për përgatitjen e seancës plenare, në të cilën, përveç kohës për deklarime jashtë rendit të ditës dhe koha për pyetje parlamentare, do të miratohet procesverbalit nga seanca e mëparshme.

Kryesia po ashtu do të vendosë nëse në seancën e ardhshme do të shqyrtohet projektligji për ratifikimin e marrëveshjes ndërmjet Qeverisë së Republikës së Kosovës dhe Qeverisë së Dukatës së Madhe të Luksemburgut, projektligji për ratifikimin e marrëveshjes bilaterale ndërmjet Qeverisë së Republikës së Kosovës dhe Qeverisë së Dukatës së Madhe të Luksemburgut për Projektin e Bashkëpunimit për Zhvillim: “KSV/018: Mbështetje Institucionale dhe Teknike për Sistemin e Furnizimit me Ujë në Rajonin e Mitrovicës”, projektligji p? ?r Auditorin e Përgjithshëm dhe Zyrën Kombëtare të Auditimit të Republikës së Kosovës, projektligji për administrimin e pasurisë së sekuestruar dhe të konfiskuar dhe projektligji për Mjekësinë Ligjore.

Po ashtu, sot do të vendoset nëse deputetët në seancën e radhës do të shqyrtojnë projektligjin për patentë shofer, projektligjin për Shërbimin e Jashtëm të Republikës së Kosovës, projektligjin për letërnjoftimin.

Kryesia do të vendosë po ashtu nëse në seancë do të shqyrtohet raporti i Komisionit për Punë të Jashtme për mbikëqyrjen e zbatimit të Ligjit për Shërbimin Konsullor, të misioneve diplomatike dhe konsullore të Republikës së Kosovës dhe rekomandimet lidhur me raportin e auditimit për pasqyrat financiare të Ministrisë së Integrimeve Evropiane për vitin 2014.

Në këtë mbledhje do të shqyrtohen po ashtu edhe rekomandimet lidhur me raportin e auditimit të performancës për mirëmbajtjen dhe ser visimin e veturave zyrtare, si dhe raportit të auditimit të pasqyrave financiare për Ministrinë e Administratës Publike, Këshillin Gjyqësor të Kosovës, Doganën e Kosovës dhe Policinë e Kosovës për vitin 2014, raportin e Autoritetit Rregullativ të Komunikimeve Elektronike dhe Postare për vitin 2014, raportin për gjendjen e mjedisit në Kosovë për vitin 2015, si dhe përzgjedhjen e një anëtari joekzekutiv të Bordit të Bankës Qendrore të Republikës së Kosovës.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/sot-vendoset-per-seancen-e-radhes/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala