Shpendi harron premtimin, nuk e hap pishinën e Gërmisë

Autori:Avdyl Pajaziti

Edhe pse çdo vit pishina e Gërmisë ishte hapur rreth gjysmës së qershorit, sivjet kjo pishinë ende nuk është hapur për vizitorë dhe nuk ishte faji te temperaturat e ulëta që kanë mbretëruar deri më tash, por te zvarritja e punëve për meremetimin e saj.

Edhe pse kryetari i Prishtinës, Shpend Ahmeti, pasi u pat zgjedhur në postin e të parit të Prishtinës pati premtuar se pishina do të hapet në fillim të sezonit veror të vitit të kaluar, kjo nuk po ndodh as sivjet.

Punimet që janë duke u bërë në këtë pishinë, sipas zyrtarëve komunalë, kanë ngecur për shkak të mosdakrodimit ndërmjet Komunës së Prishtinës dhe kompanisë kontraktuese “Arda Rei” për kryerjen e punimeve.

Zëdhënësja e Komunës së Prishtinës, Miranda Mullafazliu, ka pranuar se shkaku kryesor se përse ende nuk po hapet pishina e Gërmisë janë ngecjet në kryerjen e punëve kontraktuese, por nuk ka pranuar të jap ndonjë afat se kur mund të hapet kjo pishinë për vizitorë.

Ajo vetëm na ka informuar se të enjten, në orën 10:00, drejtoresha komunale për Kulturë e Sport, Saranda Bugojevci, do të zhvillojë një vizitë në pishinën e Gërmisë dhe aty ajo do të deklarohet për media edhe lidhur me afatin për hapjen e pishinës.

Nga ajo sa shihet me sy, në pishinën e Gërmisë po finalizohen punët përfundimtare dhe pishina ka filluar të mbushet me ujë.

Edhe sipas disa postimeve që zyrtarët e Komunës së Prishtinës i kanë bërë në rrjetin social Facebook del se kanë përfunduar pothuajse të gjitha përgatitjet dhe kanë mbetur vetëm disa detaje të vogla deri në hapjen solemne të kësaj pishine. /Kosovalive360/.

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/shpendi-harron-premtimin-nuk-e-hap-pishinen-e-germise/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala