Shoqatat e dala nga lufta kundër Isa Mustafës

Autori:Avdyl Pajaziti

Shoqatat e dala nga lufta i kanë dalë në mbrojtje ish kreut të SHIK’ut shqiptar, Fatos Klosi.

Duke marrë në mbrojtje Klosin, këto shoqata i quajnë ‘keqdashës dhe klika titiste’ ata që e sulmuan Klosin. E në krye të reagimeve ndaj Klosit ishte vetë Kryeministri Isa Mustafa, të cilin këto shoqata aludojnë kur flasin për ‘klika titiste’.

“Lufta çlirimtare e shqiptarëve të Kosovës, të organizuar në radhët e Ushtrisë Çlirimtare të Kosovës, e kishte të domosdoshme dhe jetike mbështetjen e shtetit amë, Shqipërisë dhe institucioneve të saj, politike e shtetërore”.

OVL e UÇK’së thotë se cilado qeveri që do të ishte në pushtet, Shtabi i Përgjithshëm do të kërkonte domosdosmërisht krijimin e urave të përbashkëta të bashkëpunimit dhe të realizimit të misionit historik, çlirimin e Kosovës.

“Duhet pranuar se shteti shqiptar, pavarësisht nga vështirësitë e vitit 1997 dhe më pas, kur vendi ishte i shkatërruar dhe nën monitorimin ndërkombëtar, vuri të gjitha mundësitë e saj institucionale për të bërë të mundur që Ushtria Çlirimtare e Kosovës të kishte një mjedis të sigurt në Shqipëri. Por, në asnjë rast dhe në asnjë mënyrë nuk ka pasur mes UÇK-së dhe Shtetit Shqiptar marrëdhënie varësie ose diktati, përkundrazi, ata kanë ruajtur fizioniminë dhe personalitetin e tyre politik, juridik dhe ushtarak”.

Sipas Shoqatave të dala nga Lufta, në mes të institucioneve të përcaktuara qartë në dobi të Luftës sonë çlirimtare, do të ishte edhe Shërbimi Informativ Shqiptar, i drejtuar nga Fatos Klosi.

“Vetëm keqdashësit dhe klika titiste, e realizuar edhe një herë përmes një pushteti administrativ, nuk mund të dinë të vërtetën se përmes Shërbimit Shqiptar ishin edhe Institucione të tjera të një rëndësie të veçantë ndërkombëtare dhe përmes zotit Klosi u vendosën lidhje të qëndrueshme me botën ndërkombëtare, në ato fusha ku ishte edhe detyra e tij institucionale”.

“Fatos Klosi, ndoshta edhe më shumë nga sa ishte detyra e tij, u angazhua fuqimisht në përpjekjet e Ushtrisë Çlirimtare të Kosovës. Ai ndihmoi me të gjitha kompencat që i jepte detyra e tij, që në luftë shqiptarët të ishin së bashku, që rrugët e shtetit shqiptar të ishin gjithnjë e më të sigurta, që përmes strukturave të tij të krijoheshin lidhje edhe me institucionet e tjera të shtetit shqiptar”.

Këto shoqata vlerësojnë se lufta në Kosovë nuk mund të perceptohet pa kontributin e Shqipërisë, pavarësisht se kush qeveriste asaj kohe, ashtu si eksodi i madh i shqiptarëve të Kosovës gjeti mbështetjen më të madhe tek vëllezërit e Shqipërisë.

“Përpjekjet e vazhdueshme të Klosiy në dobi të luftës sonë çlirimtare, duan apo nuk duan strukturat e vjetra politike, janë të një rëndësie të veçantë dhe si të tilla ato kanë mirënjohjen e luftëtarëve, strukturave dhe shtabeve drejtuese të ushtrisë Çlirimtare të Kosovës, veteranëve, invalidëve dhe familjeve të dëshmorëve”, thuhet në reagimin e këtyre shoqatave

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/shoqatat-e-dala-nga-lufta-kunder-isa-mustafes/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala