Shkolla e Agrobiznesit rrezikon të mbyllet

Autori:Avdyl Pajaziti

Drejtori i Arsimit në Komunë e Gjilanit, Nazmi Musa ka thënë se shkolla e Agrobiznesit rrezikon të mbyllet në të ardhmen, për shkak të numrit të vogël të nxënësve.

Ai ka propozuar ndarjen 50 bursave për nxënësit e shkollës së Agrobiznesit, gjë që është përkrahur edhe nga Komiteti i Arsimit në këtë komunë. Musa ka thënë se këto bursat në shumë prej shumë 17.500 euro, do të jetë pjesë e konkursit për regjistrim në shkollat e mesme.

Ndarja e këtyre bursave është parë si nevojë për motivimin e të rinjve për drejtimet profesionale, ku aktualisht interesimi është shumë i ultë. Ndërkohë, Komiteti i Arsimit ka kërkuar të shikohen mundësitë për rritjen e numrit të bursistëve.

Njëherësh, KA është njoftuar nga drejtori Nazmi Musa se kanë përfunduar procedurat e emërtimit dhe riemërtimit të disa shkollave, ndërsa për disa të tjera, MASHT-i ka kërkuar plotësim të propozimeve.

Kësisoj shkolla “Abaz Ajeti” prej shtatorit të këtij viti do të quhet “7 Marsi”, shkolla në lagjen “Zabeli…” që deri tani ka qenë e pa emërtuar, do të quhet “Zija Shemsiu”, kurse shkolla e mesme e Artit Pamor do të mbajë emrin “Adem Kastrati”.

Për tri shkolla tjera, gjimnazin e ri, që është propozuar të quhet “Xhavit Ahmeti”, shkollën në lagjen “Kodra e Dëshmorëve” (e njohur si lagja 2), që është propozuar të quhet “Sadullah Brestovci” si dhe për shkollën në Lagjen e Re (e njohur si lagja 8), që është propozuar të mbajë emrin “Nazmi Hoxha”, është kërkuar plotësimi i procedurave.

Edhe Kishnapola ka kërkuar riemërtimin e shkollës së fshatit, nga “Afërdita” në “Nijazi Osmani”. Edhe kjo dosje duhet të plotësohet, ka thënë Musa, duke nënvizuar se të gjitha propozimet janë bërë nga këshillat e shkollave. Detyura e DKA-së ka qenëqë t`i përcjellë propozimet në MASHT, që është përgjegjës për emërtimin e shkollave, në bazë të propozimeve të dërguara.

KA është njoftuar edhe me rezultatet e testit të arritshmërisë. Nazmi Musa, drejtor i Arsimit, ka thënë se Gjilani ka arritur të dalë komuna e parë në nivel të vendit në testin për klasat e nënta dhe ky është një sukses i punës së mirë që kanë bërë nxënësit dhe mësimdhënësit e kësaj komune gjatë kësaj faze të shkollimit.

Në nivel komunal, rezultatet më të mira i ka arritur shkolla “Selami Hallaqi”, e cila pasohet nga “Abaz Ajeti”, ndërkaq suksesin më të dobët e ka pasur shkolla “Bajram Curri” e Shurdhanit.

Përndryshe, sa i përket regjistrimit në klasën e parë fillore, Musa ka thënë se do të vazhdojë të zbatohet formula e deritashme, ku merret parasysh rajonalizimi, numri i barabartë i nxënësve nëpër paralele, gjina dhe përzgjedhja sipas alfabetit.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/shkolla-e-agrobiznesit-rrezikon-te-mbyllet/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala