Shënohet Dita Ndërkombëtare e Fëmijëve

Autori:Avdyl Pajaziti

Me rastin e 1 Qershorit – Ditës Ndërkombëtare të Fëmijëve, Ministria e Arsimit, Shkencës dhe Teknologjisë (MAShT), organizon ceremoninë e ndarjes së çmimeve fituese për nxënësit e shkollave të artit në Kosovë, pjesëmarrës në garën për skenarin më të mirë me temën “Të gjithë në shkollë”.

Skenari i vlerësuar më i miri nga ana e komisionit është realizuar në film dhe ai do të transmetohet në këtë ceremoni.

Ndarjen e çmimeve do ta bëjë ministri i Arsimit, Shkencës dhe Teknologjisë, Arsim Bajrami.

Ndërsa, organizata joqeveritare ETEA, për nder të Ditës Ndërkombëtare të Fëmijëve do të organizojë aktivitete të shumta në bashkëpunim me Drejtorinë e Kulturës dhe atë të Arsimit të komunës së Prishtinës.

Ndër aktivitetet që do të organizohen, është “Asambleja e Fëmijëve” në Asamblenë Komunale të Prishtinës. Në këtë aktivitet janë të ftuar nxënës të 13 shkollave fillore të kryeqytetit të cilët do të mbajnë një seancë simbolike për të drejtat e tyre. Secila shkollë ka përgatitur një ese për një çështje specifike që ka të bëjë me të drejtat e fëmijëve, dhe si rrjedhojë këto ese në formë fjalimesh do të lexohen nga nxënësit në foltoren e Asamblesë dhe më pastaj do të votohen. Përmbylljen e këtij aktiviteti do ta bëj kryetari i komunës së Prishtinës, Shpend Ahmeti.

Po ashtu, do të organizohet edhe një debat për liritë dhe të drejtat e fëmijëve, ku, përveç nxënësve dhe prindërve, do të marrin pjesë edhe përfaqësues të institucioneve kompetente.

Kurse, Fakulteti Juridik i AAB-së, me rastin e Ditës Ndërkombëtare të Fëmijëve, në kuadër të Manifestimit Tradicional “Ditët e AAB –së 2015“, sot do të mbajë një tryezë me temën “Pozita e fëmijëve në shoqëri , të drejtat e tyre dhe format e ndryshme të abuzimit“.

Tryezën, që fillon në orën 09:30, do ta hapin rektori i Universitetit AAB Lulzim Tafa dhe dekani i Fakultetit Juridik, Muhamet Kelmendi, ndërsa ndër panelistët janë ministri i Drejtësisë, Hajredin Kuçi dhe përfaqësues të institucioneve të vendit dhe ndërkombëtare.

Është paraparë edhe një diskutim i hapur me të gjithë pjesëmarrësit në tryezë.

Po ashtu, për këtë një grup nxënësish nga shtatë regjionet e vendit do të vizitojnë Kuvendin e Republikës së Kosovës.

Në sallën e mbledhjeve plenare, nga një fjalë mirëseardhjeje për nxënësit do të mbajnë kryetari i Kuvendit të Republikës së Kosovës, Kadri Veseli dhe drejtoresha rajonale e UNICEF-it, Marie – Pierre Poirier.

Në kuadër të kësaj vizite, nxënësit do të njihen edhe me ambiente të tjera të Kuvendit të Kosovës, njoftoi Zyra për media dhe marrëdhënie me publikun e Kuvendit.

Një tjetër edicion special i BarCamp Prishtina, i organizuar nga IPKO Foundation në bashkëpunim me Green Art Center Prishtina, do të mbahet të hënën në orën 12:30 në Gërmi (menjëherë pas pishinës).

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/shenohet-dita-nderkombetare-e-femijeve/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala