Serbia ka bllokuar librat shqip për nxënësit nga Lugina

Autori:Avdyl Pajaziti

Politika po i mban peng librat shqip për nxënësit e Luginës së Preshevës, të cilët u dërguan si donacion nga Ministria e Arsimit e Kosovës.

Për këtë çështje, është biseduar edhe në takimin e fundit në Bruksel ndërmjet palës kosovare dhe asaj serbe.

“Ia kemi bërë të qartë qeverisë së Serbisë se do të ketë masa të reciprocitetit. Nëse këta libra nuk shkojnë në duar të nxënësve shqiptarë të Luginës, në Kosovë nuk do të lejohet asnjë libër nga Serbia”, ka thënë ministrja për Dialog, Edita Tahiri, raporton KTV.

Kurse, këshilltari juridik i ministrit të arsimit, Arsim Bajrami, Azem Guri, ka deklaruar se Ministria e Arsimit e Serbisë ende është duke e bërë verifikimin e përmbajtjes së këtyre librave.

Guri ka treguar se ende nuk dihet se kur do të zgjidhet kjo çështje.

Pas kërkesës së Këshillit Nacional të Luginës së Preshevës, për furnizim me libra nga Kosova, ministri i Arsimit, Arsim Bajrami, kishte marrë vendim për dhurimin e një donacioni prej më shumë se 103 mijë ekzemplarëve.

Mirëpo, dy kamionët me libra që shkuan më 9 shtator në Luginë të Preshevës, kanë mbetur të bllokuar në terminalin doganor në Preshevë.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/serbia-ka-bllokuar-librat-shqip-per-nxenesit-nga-lugina/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala