Raportuesi i KE-së, Conde: Kosova në moçal korrupsioni

Autori:Avdyl Pajaziti

Raportuesi i Këshillit të Evropës për Kosovën, parlamentari spanjoll Agustín Conde, në fillim të janarit ka publikuar raportin e tij mbi situatën në Kosovë.

Përshkrimi që i bën Conde gjendjes në Kosovës është i zymtë.

Conde deklaron se korrupsioni në Kosovë është endemik dhe i gjithanshëm – dhe ka infektuar të gjitha fushat: qeverinë, biznesin, drejtësinë.

Në indeksin e korrupsionit të Transparency International Kosova zë vendin e 110-të – prej 175 vendeve apo territoreve të verifikuara. Sipas Conde Kosova e ka nivelin e njëjtë të korrupsionit si Shqipëria, por më të lartë se të gjitha vendet e tjera anëtare të Këshillit të Evropës.

Kjo i bie se Kosova dhe Shqipëria janë më thellë të zhytura në moçalin e korrupsionit se ish-republikat sovjetike si Moldavia, Azerbejxhani, Armenia, Ukraina. Përkundër përbetimeve të politikanëve të Kosovës se korrupsioni po luftohet dhe do të luftohet në Kosovë, shifrat flasin të kundërtën.

Kësisoj në vitin 2014 Agjencia Kundër Korrupsionit inicioi 304 raste të korrupsionit. Prej tyre vetëm 30 përfunduan në prokurori. Raporti i Këshillit të Evropës përkujton se ky është numri më i vogël i rasteve të iniciuara të korrupsionit që nga vitit 2007, kur Agjencia Kundër Korrupsionit filloi punën.

Mbi 70 për qind e rasteve të hetuara nga Agjencia Kundër Korrupsionit nuk ndiqen më tutje nga organet e drejtësisë. Hetimet e rralla të zhvilluara kundër personave që mbajnë pozita të nivelit të lartë nuk kanë përfunduar asnjëherë me dënime. /dialogplus.ch

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/raportuesi-i-ke-se-conde-kosova-ne-mocal-korrupsioni/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala