Qeveria e Kosovës: MSA i hap rrugë proceseve integruese në BE

Autori:Avdyl Pajaziti

Qeveria e Republikës së Kosovës, përshëndet miratimin e sotëm në Kuvendin e Republikës së Kosovës të Ligjit për Ratifikimin e Marrëveshjes së Stabilizim Asociimit, ndërmjet Republikës së Kosovës dhe Bashkimit Evropian dhe Komunitetit Evropian të Energjisë Atomike.

Përmes një komunikate dërguar medieve, Qeveria e Kosovës e konsideron këtë vendim shumë të rëndësishëm për shtetin dhe qytetarët e Kosovës, i cili i hap rrugën proceseve të mëtejshme integruese të Kosovës në Bashkimin Evropian.

“Marrëveshja e Stabilizim Asociimit, vendos bazamentin e marrëdhënieve kontraktuale ndërmjet Kosovës dhe BE-së, që përbën një mundësi shumë të mirë për ndërmarrjen e reformave për fuqizimin shtetit ligjor, krijimin e kushteve për zhvillim ekonomik, thellimin e bashkëpunimit ekonomik e tregtar me vendet e BE-së, dhe përafrim të gjithanshëm të Kosovës me vlerat dhe standardet evropiane”, thuhet në komunkatën e Qeverisë së Kosovës.

“Qeveria e Republikës së Kosovës zotohet se do të punojë me përkushtim edhe më të madh për përmbushjen e të gjitha kritereve të parapara në këtë Marrëveshje, që të bëhet anëtare e Bashkimit Evropian brenda një periudhe optimale”, thuhet tutje.

Qeveria e Kosovës falënderon Bashkimin Evropian dhe të gjitha shtetet anëtare të saj, si dhe të gjitha institucionet dhe qytetarët e Republikës së Kosovës për përkushtimin e palëkundur për të quar përpara agjendën evropiane, si të vetmen alternativë dhe aspiratë integruese të popullit të Kosovës. /Indeksonline/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/qeveria-e-kosoves-msa-i-hap-rruge-proceseve-integruese-ne-be/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala