Qeveria: Ajo çka gjeti policia te VV-ja tregon degradimin e opozitës

Autori:Avdyl Pajaziti

Qeveria e Kosovës e ka përshëndetur mbarëvajtjen e protestës së partive opozitare të mbajtur të shtunën në Prishtinë, duke vlerësuar se nuk dolën aq njerëz sa parashikoi opozita, përkundër angazhimit maksimal të opozitës për t’u siguruar transport nga të gjitha anët e vendit.

Qeveria, përmes një komunikate, ka vlerësuar se qytetarët kërkojnë zgjidhje institucionale të provlemeve e jo anarki, ndërsaë është shprehur e gatshme për të biseduar me opozitën rreth shqetësimeve të tyre deri në një vendim përfundimtar të Gjykatës Kushtetuese mbi Asociacionin.

“Qeveria e Republikës së Kosovës përshëndetë mbarëvajtjen e protestës së partive opozitare, të mbajtur më 28 nëntor 2015, në Prishtinë. Qeveria e Republikës së Kosovës, po ashtu, çmon lartë sjelljen e qytetarëve të Prishtinës dhe tërë Kosovës, të cilët vazhduan aktivitetet e tyre kremtuese për nder të Festës së 28 Nëntorit”, thuhet në kumtesën e Qeverisë.

“Qeveria e Republikës së Kosovës ka treguar gatishmëri për të biseduar rreth shqetësimeve të subjekteve opozitare. Në këtë drejtim, Qeveria është duke pritur interpretimin e Gjykatës Kushtetuese të Republikës së Kosovës për Marrëveshjen për krijimin e Asociacionit të Komunave me Shumicë Serbe në Kosovë, si dhe ka iniciuar ekspertizë ndërkombëtare për procesin e përkufizimit të vijës kufitare ndërmjet vendit tonë dhe Malit të Zi, duke siguruar ballafaqimin e argumenteve të Komisionit shtetëror dhe të opozitës. Prandaj, Qeveria vlerëson se askush, andaj as opozita, nuk duhet të frikësohet nga e vërteta, por çdonjëri duhet të ballafaqohet me të. Për Qeverinë e Republikës së Kosovës, çdo përpjekje për të përdorur këto procese të rëndësishme për të sotmen dhe të ardhmen e vendit tonë, për qëllime politike e partiake, është e papranueshme”.

Qeveria thotë se “numri i kufizuar i pjesëmarrësve në protestën e 28 Nëntorit, në krahasim me parashikimet e opozitës, edhe përkundër shpenzimeve të mëdha për transportin e siguruar nga të gjitha anët e vendit, flet se shumica dërmuese e qytetarëve kërkojnë zgjidhje institucionale të problemeve, stabilitet të vendit, paqe, zhvillim ekonomik dhe siguri, e jo anarki për qëllime të një grupi të ngushtë politik. Krahas flamurit kombëtar, qytetarët e vendit tonë respektojnë simbolet, flamurin dhe shtetin e tyre të pavarur”.

“Përdorimi i dhunës në Kuvend, hedhja e vezëve, gazit lotsjellës dhe sprejit, si dhe sulmet ndaj Kryeministrit të vendit e pjesëtarëve të Qeverisë, kërcënimet e VV-së se qeveritarët nuk do të kenë jetë private, si dhe materialet dhe pajisjet që policia gjeti në Selinë e VV-së, flasin se deri në çfarë shkalle ka degraduar organizimi i opozitës, sidomos i Lëvizjes VV, kundër Republikës së Kosovës dhe institucioneve të saj”.

“Qeveria e Republikës së Kosovës u jep mbështetje të plotë organeve kompetente për zbatimin e ligjit në Kosovë, Policisë së Kosovës, Prokurorisë së shtetit dhe organeve gjyqësore, ndërsa thekson se në asnjë mënyrë nuk ka ndërhyrë, n uk po ndërhynë dhe nuk do të ndërhyjë, për asnjë moment, në kompetencat dhe përgjegjësitë e pushteteve tjera”.

“Qeveria e Kosovës përkrahë plotësisht mbajtjen e rregullt të seancave të Kuvendit të Republikës së Kosovës. Kuvendi është vendi ku zhvillohet debati demokratik për çdo shqetësim të pozitës, opozitës dhe të qytetarëve të Kosovës, kurse është e papranueshme çdo sjellje e dhunshme që pengon punën normale të Kuvendit dhe rrezikon jetën e deputetëve, anëtarëve të Qeverisë, mediave dhe pjesëmarrësve tjerë”, përfundon kumtesa. /Telegrafi/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/qeveria-ajo-cka-gjeti-policia-te-vv-ja-tregon-degradimin-e-opozites/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala