Propozimet e Abdixhikut për negociata me Serbinë

Autori:Zekirja Shabani

Drejtori i Institutit për Hulumtime Zhvillimore ka dhën katër propozime për negociatat ekonomike që do të duhej të zhvilloheshin mes Kosovës dhe Serbisë.

Lexojeni të plotë propozimin e tij të postuar në facebook:

Për gjithë propaganduesit e qeverisë serbe, dhe për ndonjë pe-lëshues potencial tonin, kur jemi tek negociatat dhe ekonomia, me Serbinë mund dhe duhet të flasim vetëm për temat në vijim:

  1. Ndarjen proporcionale të hises së Kosovës në ish-Jugosllavi: Më 25 maj të vitit 2001, shtetet e ish-Jugosllavisë nën mbikëqyrjen dhe njohjen e Kombeve të Bashkuara, kishin nënshkruar në Vjenë marrëveshjen për ndarjen e hises e pasurisë federative. Kjo hise nënkuptonte pronësinë e 271,642 monedhave të arit (sot në vlerë prej 300 milion eurove); 1 miliardë euro (vlerë e sotshme) e parave të gatshme; e rreth 123 asete të paluajtshme të ambasadave e konsullatave nëpër të gjithë botën. Kështu Bosnja kishte marrë 13% të pasurisë, Kroacia 28%, Maqedonia 6%, Sllovenia 16% e Serbia bashkë me Malin e Zi plot 37%. Hiseja e Kosovës kishte përfunduar në llogaritë e Serbisë. Pavarësia e Kosovës prej Serbisë nënkupton njëtrajtësisht dhe trashëgiminë e pasurisë të ish-Jugosllavisë; veçanërisht kur Kosova ka paguar dhe paguan ende borxhet e ish-Jugosllavisë (rreth 1 miliardë euro).
  2. Kthimin e Fondit Pensional: Me rrënimin e autonomisë së Kosovës, të gjitha kontributet pensionale të qytetarëve rezident të Kosovës – në vlerë prej 2 miliardë dollarëve – ishin shtetëzuar e bartur unilateralisht në fondet shtetërore të Serbisë nën regjimin e Millosheviqit. Që nga përfundimi i luftës, rreth 40.000 pensionistë kosovarë kishin mbetur pa pensione përkundër kontributit jetësor në një fond që përfundonte si i plaçkitur. E drejta e pensionistëve është e konfirmuar dhe me Gjykatën e Strasburgut, prandaj kthimi i fondeve pensionale është jo vetëm prioritar por dhe lehtësisht i mundshëm.
  3. Trashëgiminë e pronave kosovare në Serbi: Sipas Agjencisë Kosovare të Privatizimit, në territorin e Serbisë janë plot 104 prona – degë të ndërmarrjeve kosovare – e të cilat janë privatizuar e transferuar pa kompenzuar asnjëherë pronarët përfundimtar të tyre – pra ndërmarrjet kosovare. Kosova ka edhe 70 prona të tjera në gjithë territorin e ish-Jugosllavisë.

Dhe më e rëndësishmja,

  1. Kompensimin e reparacionin e dëmeve të luftës: Pas një procesi verifikues (domosdo ndërkombëtar) – dhe sidomos pas kërkimfaljes – Serbia duhet të kompensojë Kosovën për të gjitha dëmet njerëzore, materiale e kapitale të bëra përgjatë gjithë luftës së fundit. Përtej dëmeve humane të parikuperueshme financiarisht e moralisht, Serbia vlerësohet të ketë bërë rreth 4 deri në 5 miliardë euro dëme në Kosovë.

Le të flasim pra. Kemi shumë për t’folur, e Serbia dhe më shumë për t’paguar. Por assesi për Trepçën e për pasurinë tonë të njohur botërisht si të tonën

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/propozimet-e-abdixhikut-per-negociata-me-serbine/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala