Pritet ndëshkimi i atyre që dëmtuan procesin e testit të maturës

Të gjitha ata që kanë kontribuar në dëmtimin e procesit të testit të maturës shtetërore, do të ndëshkohen.

Ministria e Arsimit tanimë ka bërë identifikimin e këtyre personave, raporton KTV.

Kryetari i Komisionit Qendror Shtetëror për Maturë, Azem Guri, ka bërë të ditur se e kanë identifikuar arsimtarin në një shkollë të Klinës, i cili shihet duke ia plotësuar testin një maturanti, por ai nuk ka dhënë detaje të tjera.

E përveç këtij rasti e rasteve të tjera të tilla, edhe këtë vit në shumicën e shkollave ku janë mbajtur testet, nxënësit kanë arritur të kopjojnë dhe të bashkëpunojnë ndërmjet veti.

Madje, edhe pse u ishin marrë celularët paraprakisht, në disa raste ata kanë arritur t’i fotografojnë testet dhe t’i këmbejnë përgjigjet e sakta nëpërmjet rrjeteve sociale.

Lidhur me këtë eksperti i çështjeve të arsimit, Jusuf Thaçi, njëherësh menaxher i projektit Atomi, ka deklaruar se në përgjithësi organizimi i testit ka qenë më i mirë se vitet e kaluara.

Mirëpo, sipas tij, kopjimi dhe dekonspirimi i testeve duhet të ndalohet dhe të ndëshkohet nga ana e ministrisë, transmeton Koha.net.

Të shtunën rreth 33 mijë maturantë nga i gjithë vendi i janë nënshtruar pjesës së parë të provimit kombëtar të maturës shtetërore.