Pritet arrestimi i Kurtit dhe Haxhiut

Autori:Avdyl Pajaziti

​Gjykata Themelore në Prishtinë gjatë ditës së premte pritet që ta lëshojë urdhrin për arrestimin e deputetëve të Lëvizjes “Vetëvendosje”, Albin Kurti e Albulena Haxhiu, pasi këta të fundit kanë refuzuar kërkesën e Prokurorisë për t’u intervistuar lidhur me hedhjen e gazit lotsjellës në Kuvendin e Kosovës.

Kryeprokurori i Prokurorisë Themelore në Prishtinë, Ymer Beka, ka konfirmuar për gazetën “Zëri” se deputetëve Albin Kurti e Albulena Haxhiu para disa ditësh u është dërguar thirrja për t’u marrë në pyetje nga Prokuroria dhe u është caktuar një afat ligjor se deri kur do të mundë të paraqiten tek organi i akuzës. Ky afat, sipas tij, ka qenë 22 tetori dhe deri në këtë datë asnjëri nga deputetët nuk janë paraqitur.

“Deri sot (e enjte) ka qenë afati i rregullt që e ka lejuar prokurorja e rastit Besa Limani. Pas mosparaqitjes së të dyshuarve, Prokuroria në bazë të ligjit, do t’i drejtohet gjykatës me kërkesën për lëshimin e urdhrit të arrestit për dy personat në fjalë”, ka bërë me dije Beka.

Prokuroria është duke zhvilluar hetime edhe ndaj një deputeti tjetër të kësaj Lëvizjeje “Vetëvendosje”, Faton Topalli, si dhe shefes së grupit parlamentar të Aleancës për Ardhmërinë e Kosovës, Donika Kadaj-Bujupi. Derisa Kurti e Haxhiu dyshohen për hedhjen e gazit lotsjellës në seancën e 8 tetorit, Kadaj-Bujupi e Topalli dyshohen për vepra të njëjta të paligjshme të kryera gjatë seancës së mbajtur më 15 tetor.

Sipas kryeprokurorit Beka, kërkesa për urdhërarrest do të bëhet nesër. ndërsa mbetet në duar të gjykatës se kur do ta lëshojë urdhrin e arrestit.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/pritet-arrestimi-i-kurtit-dhe-haxhiut/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala