Personat me aftësi të kufizuar mund të punësohen në proceset zgjedhore

Autori:Gazeta Fjala

Personat me aftësi të kufizuara, tashmë, do të kenë mundësi të përfshihen si staf në proceset zgjedhore në Kosovë.

Kjo, falë memorandumit të bashkëpunimit, të rritur mes Komisionit Qendror i Zgjedhjeve, Shoqatës Handikos, Shoqatës së të Verbërve të Kosovës, Shoqatës te të Shurdhërve dhe Shoqatës Dawn Syndrome Kosova, e përkrahur nga USAID, projekt ky që u finalizua sot.

Përfaqësues të KQZ-së dhe të shoqatave të personave me aftësi të kufizuara, u zotuan se do të punojnë që kjo marrëveshje të implementohet.

Përveç mundësisë që kanë personat me aftësi të kufizuara, që u garantohet me ligj, që të shprehin lirshëm vullnetin qytetar, duke votuar në zgjedhjet që mbahen, ata tashmë do të mundë të kontribuojnë si pjesë e stafit në proceset zgjedhore që do të mbahen.

Kryetarja e KQZ-së, Valdete Daka, shprehu përkushtimin e Komisionit Qendror të Zgjedhjeve, për të përmbushur zotimet në këtë memorandum, dhe për të ndërtuar mundësi të barabarta për të gjithë njerëzit.

“Ne sot po shkojmë edhe me një hap më tej, duke përmirësuar mundësitë që të gjithë anëtarët e këtyre shoqatave të ke në mundësi, si staf jo-permanent të marrin pjesë, të punësohen gjatë zgjedhjeve, në komisionin qendror të zgjedhjeve. Po ashtu, sipas kësaj marrëveshje të bashkëpunimit ne do të lehtësojmë dhe do të krijojmë kushte për këto kategori për ushtrimin e të drejtës së votës në proceset zgjedhore”, tha ajo.

Sarah Buchanan, drejtoreshë e zyrës për demokraci dhe qeverisje në USAID vlerësoi se janë duke dhënë kontribut të rëndësishëm për këtë proces.
“Memorandumi i bashkëpunimit që po nënshkruajmë sot, është vetëm një shembull i rëndësisë që shumë akterë të ndryshëm kanë ndaj këtij procesi. Dhe, niveli i përkushtimit të cilin e kanë ata, duke nënshkruar këtë memorandum, të gjitha palët angazhohen ose zotohen që të shfrytëzojnë resurset për të s iguruar se personat me këto aftësi do të jenë në gjendje të marrin pjesë në zgjedhje, së bashku me monitoruesit tjerë. Dhe, do të japin kontribut të rëndësishëm këtij procesi”, tha ajo.

KQZ është ndër komisionet e pakta në botë që ua ka mundësuar të verbërve të votojnë. Drejtori ekzekutiv i HandiKos Afrim Maliqi, vuri theksin te mungesa e zbatimit të ligjeve.

“Neve na mbetën ende shumë sfida që do të kalojmë. Sidomos rreth disa ligjeve, që kanë të bëjnë me të drejtat e personave me aftësi të kufizuara, e të cilat fatkeqësisht nuk po gjejnë zbatim”, tha ai.

Për angazhimin dhe punësimin e personave me aftësi të kufizuar foli edhe Florian Dushi, anëtarë i KQZ-së nga radhët e Lidhjes Demokratike të Kosovës.

Ai, tha se KQZ do t’ua mundësoj personave me aftësi të kufizuar të punojnë si staf i zgjedhur në përputhje me profilin dhe mundësitë e tyre.

“KQZ ka për qellim që të ofrojë mundësi të barabarta për të gjithë personat me aftësi të kufizuara në proceset zgjedhore, por edhe të krijojë mundësi që të njëjtat të rrisin aftësitë e tyre dhe të mund të punësohen në pozitat e tyre si staf i zgjedhur, në përputhje me profilin, dhe mundësitë e tyre në kuadër të KQZ-së.

Rritja e pjesëmarrjes së personave me aftësi të kufizuara në proceset zgjedhore, inkurajimi dhe motivimi i tyre për pjesëmarrje për jetën publike e politike, ndërgjegjësimi dhe ngritja e vetëdijes qytetare mbi të drejtat e personave me aftësi të kufizuara dhe nevojat për të eliminuar paragjykimet, pjesëmarrje të plotë të barabartë për të gjithë, janë edh e disa prej prioriteteve të këtij projekti.

 

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/personat-me-aftesi-te-kufizuar-mund-te-punesohen-ne-proceset-zgjedhore/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala