Pacolli: U përfshiva vonë në lobim, s’dua të tregoj sa vota i sigurova

Autori:Avdyl Pajaziti

Presidenti i AKR’së, Behgjet Pacolli thotë se ai u inkuadrua vonë në lobimin për anëtarësimin e Kosovës në UNESCO.

Në një shkrim në Facebook, Pacolli shkruan se “iu përkushtua procesit me mish e me shpirtë”, por se “nuk dëshiron të tregojë se sa vota i siguroi”.

Shkrimi i plotë i Pacollit në Facebook:

Çka kanë të përbashkët disa çajagji të trullosur të Prishtinës me disa serbë të Beogradit?

Siç është bërë e ditur, unë u përfshiva dikur vonë në lobimin për anëtarësimin e Kosovës në UNESCO.

U përfshiva në këtë proces, sepse e ndieja se s’mund të rrija jashtë tij. E ndieja megjithatë se procesi u karakterizua prej një euforie të shpërpjesëtuar me gjendjen në terren, apo dhe me rezultatin e ngushtë në Bordin ekzekutiv të UNESCO. Kam patur vërejtjet e mia për procesin në përgjithësi dhe për shumë sende të veçanta të këtij procesi. Kam patur mëdyshjet e mia, për një proces në të cilin në rast suksesi, do dilnin shumë meritorë, dhe në rast mosarritjeje, askush nuk do pranonte përgjegjësi. Si ju e dini, në postimet e mia të mëhershme, diçka dhe është kuptuar prej këtyre mëdyshjeve.

U përfshiva me mish dhe me shpirt për suksesin. Duke u përfshirë, unë s’mund të merresha me polemika. Lashë familjen time, punët e mia. Kapërceva mbi shumëçka dhe sipas detyrimit u bëra pjesë e ekipit të shtetit tim. Të gjithë bëmë maksimumin, në atë kohë që u punua, aq sa kanë ditur, aq sa kanë mundur. Zoti e di, kolegët e dinë, sa kam bërë unë. Nuk është në stilin tim politik dhe njerëzor të mburrem, sesa vota janë rezultat i punës time.

Sot kur gongu ka rënë, unë mendoj atë që kam shkruar pak më parë, se ky rezultat është shumë i mirë. Ai u arrit në një klimë euforie të brendshme, në një klimë konfrontimi të fortë midis blloqeve të shteteve, në kushtet e pabarazisë së mjeteve të shtetit tonë të ri me ato të Serbisë. Lufta diplomatike vazhdon dhe çdo votim si ky është një mësim shumë i mirë.

E tash pas një pune të jashtëzakonshme të gjithë ekipit, po më bien mbi veshë thuajse të sinkronizuar, apo të njëzëshëm, tupanat e gojëndyrëve, injorantëve të diplomacisë në Prishtinë, me ato të do dirigjentëve të propagandës serbe në Beograd. Sipas të parëve, unë qenkam analfabet dhe kam dështuar; sipas të dytëve, unë i kam bërë presion delegacioneve në UNESCO, madje jam përpjekur t’i korruptoj. Serbët i kuptoj. Sipas një qasjeje propagandistike, serbët u munduan të na paraqisnin se ne bënim një luftë të pandershme dhe të papastër, ndërsa ata luftonin për drejtësinë dhe të vërtetën. Po këta diplomatët e çajtoreve apo pijetoreve të Prishtinës, çfarë i shtyn, akoma nuk e kam kuptuar?

A kanë të drejtë të dy palët, që s’kanë turp pse sot janë të dyja bashkë? Si thoni ju, kush ka të drejtë?

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/pacolli-u-perfshiva-vone-ne-lobim-sdua-te-tregoj-sa-vota-i-sigurova/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala