Opozita thotë se Qeveria e bëri me qëllim të premten ditë pushimi

Autori:Avdyl Pajaziti

Qeveria e Kosovës ka vendosur që me rastin festës së 28 Nëntorit, dita e premte të jetë pushim. Por, këtë veprim opozita po e vlerëson si taktikë të ekzekutivit për të ndalur pjesëmarrjen e qytetarëve në manifestimit e opozitës, i cili do të mbahet të shtunën.

Ndërsa, në Ministrinë e Administratës Publike për lajmi.net kanë thënë se nuk ka ndonjë arsye të veçantë pse e premtja është caktuar ditë pushimi.

Por, opozita si fakt tjetër të Qeverisë për të penguar pjesëmarrjen e qytetarëve në manifestimin e së shtunës, përmend ndarjen e rrogave për shërbyesit 6 ditë më herët.

Për deputeten e Vetëvendosjes, Shqipe Pantina këto janë taktika të Qeverisë, për ti stimuluar qytetarët që të largohen nga Kosova gjatë festës.

“Qeveria po përdorë edhe një taktike tjetër për të ndaluar pjesëmarrjen e qytetarëve në Manifestimin e opozitës me 28 nëntor. Sot 6 ditë më herët, siç nuk ka ndodhur asnjëherë më parë, janë paguar rrogat e punëtoreve të administratës, e poshtë të premten e ka shpallur ditë pushimi për të i stimuluar ata që të ikin për vikend jashtë Kosove, se më herët ju kishte thënë të mos shkojnë në koncerte, as në ngjarje sportive e as në qendra tregtare nëpër Kosovë”, ka shkruar Pantina në Facebook.

Kurse sekretari i Ministrisë së Administratës Publike, Fitim Sadiku ka thënë për lajmi.net se as njoftimi disa ditë më herët që e premtja do të jetë pushim dhe as, caktimi i kësaj dite si ditë pushimi nuk kanë ndonjë arsye të caktuar.

“Nuk ka ndonjë arsye nuk është bërë për ndonjë qëllim të caktuar dhe kryesisht njoftime i bëjmë dy-tri ditë më herët. Njoftimi që e premtja do të jetë ditë pushimi është bërë të hënën ose të martën”.

“Ky ka qenë vendim i qeverisë, por logjikisht kështu është më e drejtë. Më afër është e premtja dhe e shtuna, se shtuna dhe e hëna logjikisht kështu duket”, ka thënë Sadiku, për lajmi.net.

Marshi i opozitës do të mbahet me 28 nëntor, i cili organizohet nga partitë opozitare për të kundërshtuar marrëveshjet për Asociacionin dhe Demarkacionin me Malin e Zi.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/opozita-thote-se-qeveria-e-beri-me-qellim-te-premten-dite-pushimi/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala