Opozita: Thirrja e seancës, provokim për ne

Autori:Avdyl Pajaziti

Grupet Parlamentare të Opozitës kanë reaguar me një komunikatë të përbashkët në lidhje me ftesën për seancë të radhës Kuvendit, që siç është thënë do të mbahet këtë të premte nga ora 16:00.

Mirëpo thirrja e kësaj seance nga ana e partive opozitare po shihet si provokim dhe papërgjegjshmëri politike.

Lexoni më poshtë deklaratën e përbashkët të partive opozitare.

Në kohën kur Qeveria e Kosovës me marrëveshjet e veta që e rrënojnë dhe falimentojnë republikën e ka sjellur vendin në një situatë të jashtëzakonshme, insistimi i vazhdueshëm në mbajtjen e seancave të rregullta plenare nga Koalicioni është tentim kontrabandimi i normalizimit të ‘Zajednicës’ dhe faljes së tokave të Kosovës Malit të Zi. Thirrja e seancës dhe insistimi që ajo të mbahet do ta përshkallëzojë tutje situatën.

Seanca e ardhme është caktuar të mbahet në mbrëmje, nga ora 16 të premten. Ky vendim i Kryesisë së Kuvendit më së miri e paraqet punën e koalicionit qeverisës, dhe e Kryetarit të Kuvendit: ata punojnë natën, sa më larg syve të publikut, në kundërshtim të plotë me praktikat e deritashme parlamentare. Ashtu siç i kanë arritur marrëveshjet fshehtas, tash po duan t’i përvjedhin ato me këto seancat të natës.

Nuk do të ketë vazhdim të seancës për sa kohë që nuk ka tërheqje nga marrëveshjet. Protestën nuk do ta ndalim pavarësisht se në çfarë ore mbahet seanca dhe sa kërcënuese është policia e pushtetit. Qeveria e ka sjellur këtë situatë jashtëzakonshmërie në Kosovë.

Ne si deputetë të Opozitës as nuk do të zbrapsemi e as nuk do të pushojmë deri sa të tërhiqen marrëveshjet që e cungojnë Republikën dhe territorin e saj.

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/opozita-thirrja-e-seances-provokim-per-ne/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala