Opozita: Nëse i tërhiqni nënshkrimet, do ta shihni se nuk e kemi qëllim pushtetin

Autori:Avdyl Pajaziti

Krerët e partive opozitare LVV – AAK- Nisma, seancën e sotme të mbajtur në një sallë të improvizuar në Kuvend, e quajnë si mbledhje ilegale të partive në pushtet.

Në një konferencë të përbashkët, pas ngjarjeve në Kuvend, ku disa prej deputetëve opozitarë hodhën sprej dhe gaz lotsjellës, krerët e këtyre tri partive, Visar Ymeri, Ramush Haradinaj dhe Fatmir Limaj, thanë se normalitet në skenën politike kosovare dhe në institucionet e vendit, nuk do të ketë pa tërheqjen e nënshkrimit nga marrëveshjet e fundit në Bruksel.

Kreu i Vetëvendosjes, Visar Ymeri, ka mohuar deklaratat e pozitës se protestimi i partive opozitare ka për qëllim marrjen e pushteti. Ai ka thënë se këtë mund ta vërtetojnë nëse i tërheqin nënshkrimet nga marrëveshjet.

“Në takim diskutuam zhvillimet e fundit, ku konstatuam se sot ka pas një takim ilegal në njërën prej restoranteve të Kuvendit. Po shihet që nuk ka normalitet në vend pa tërheqjen e marrëveshjeve”, ka thënë kreu i LVV-së, Visar Ymeri.

Ndërsa i pari i Nismas për Kosovën, Fatmir Limaj ka folur për ftesat që prokuroria ua ka dërguar disa nga deputetëve opozitar për intervistim, duke thënë se organet e drejtësisë nuk duhet të bëhet instrument i politikës.

Limaj gjithashtu ka thënë se me veprimet që po i bëjnë, kanë për qëllim të mbrojnë shtetin.

“Dëshirojmë tu a bëjmë të qartë gjithë qytetarëve se jemi në një betejë për  të mbrojtur Republikën. Kam ftes për Prokurorinë që të mos bëhet instrument i politikës, sepse ne jemi duke mbrojtur republikën dhe duhet ta kuptoje atë”.

Kreu i AAK-së, Ramush Haradinaj, duke komentuar deklaratën  e ambasadorit amerikan se pushteti merret me votë dhe jo me armë tha se sa i përket pushtetit, “vërtet se fitohet me votë, por këtu kemi të bëjmë me territore dhe ai mbrohet në çdo formë”.

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/opozita-nese-i-terhiqni-nenshkrimet-do-ta-shihni-se-nuk-e-kemi-qellim-pushtetin/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala