OEK anëtare me të drejta të plota në Forumin Investues të Odave

Autori:Avdyl Pajaziti

Oda Ekonomike e Kosovës është anëtare me të drejta të plota të Forumit investues të odave ekonomike të Ballkanit Perëndimor, ndërsa kryetari i OEK-ut Safet Gërxhaliu anëtar i Këshillit drejtues të këtij asociacioni të biznesit në nivel të regjionit.

Duke iu drejtuar pjesëmarrësve të takimit konstitutiv të Forumit investues të Odave të mbajtur në Budvë të Malit të Zi kryetari Gërxhaliu ka vlerësuar se bashkëpunimi regjional i odave ekonomike ka rëndësi të veçantë për nxitjen e zhvillimit ekonomik dhe realizimin e kërkesave të komunitetit të biznesit me qëllim të krijimit të kushteve sa më të mira për të bërit biznes.

Ai u angazhua për partneritet në mes të odave ekonomike të regjionit dhe bashkëpunim në paraqitjen projekteve të përbashkëta ndaj donatorëve.

Kryetari Gërxhaliu u angazhua edhe për shtimin e ndikimit të odave ekonomike në vendet e Ballkanit Perëndimor përmes bashkëpunimit në mes të odave dhe forumit i cili u themelua sot.

Pjesëmarrësit e Forumit përkrah propozimin e të parit të OEK-ut për një letër të përbashkët drejtuar kryeministrave të vendeve te regjionit dhe përfaqësuesve të Komisionit Evropian me të cilën do të njiheshin me rezultatet e bashkëpunimit por edhe angazhimet e përbashkëta te odave ekonomike.

Ky Forum paraqet organizim joprofitabil të odave kombëtare të vendeve të Ballkanit Perëndimor dhe është rezultat i marrëveshjes së arritur në Vjenë në gusht të këtij viti.
Forumi ka për qëllim krijimin e kushteve për veprim dhe inkuadrim më efikas të odave dhe ndërmarrjeve të regjionit në realizimin e projekteve të infrastrukturës dhe projekteve të tjera me rëndësi për prosperitetin ekonomik të regjionit të Ballkanit Perëndimor.

Si qëllim i veçantë është angazhimi që me veprimin e përbashkët të odave ekonomike, bashkëpunimin dhe harmonizimin e aktiviteteve të përqendrohet në zhvillimin e konkurentshmërisë të ekonomive të vendeve të Ballkanit Perëndimor.

Kryetarët e odave sonte do t’i predë kryetari i Malit të Zi, Filip Vujanoviq, ndërsa nesër do të takohen me kryeministrin Millo Gjukanoviq.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/oek-anetare-me-te-drejta-te-plota-ne-forumin-investues-te-odave/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala