Nikoliq në uniformë, paralajmëron ushtarët për sulme nga Kosova

Autori:Zekirja Shabani

“Jemi gati, dhe le ta dinë të gjithë, secili që guxon të të provokoj ndonjë situatë të pakëndshme në Serbi, do të përballet me të gjithë Serbinë – ushtrinë dhe policinë serbe”.

Kështu ka thënë sot presidenti i Serbisë, Tomislav Nikoliq i cili vizitoi një prej bazave ushtarake në Jug të Serbisë përgjatë vijës kufitare me Kosovën, raporton B92.

Nikoliq u pa i veshur me uniformën e ushtrisë serbe, dhe u shoqërua nga Gjenerali Lubisha Dikoviq , i cili e informoi presidentin se situata është e qetë për momentin.

Mësohet se Nikoliq u informua edhe për kushtet ku ushtarët serbë jetojnë dhe kryejnë detyrat e tyre, dhe poashtu ka ndjekur për nga afër stërvitjet e ushtarëve serb.

Gjatë fjalimit para ushtarëve serbë, Nikoliq tha se ushtria serbe është mjaftueshëm e fortë dhe e gatshme për t’iu kundërvënë kërcënimeve dhe rreziqeve ndaj shtetit serb, dhe se detyra kryesore e ushtarëve është që të mbaj të sigurt zonën kufitare mes Serbisë dhe Kosovës.

Ai ka paralajmëruar ushtarët se në çdo moment, edhe pse kjo është kohë paqeje, ata mund të sulmohen.

“Pasi që kemi punë me terrorizmin, i cili nga Kosova kalon në Maqedoni dhe pasi që e dimë se cilat janë planet e politikës që e organizon atë, ushtrisë dhe xhandarmerisë i kemi thënë qartë se janë në paqe, por që të sillet sikur të jenë në luftë, sepse siguria kurrë nuk është e tepërt”, ka thënë Nikoliq.

Ai gjithashtu tha se është e një rëndësie të veçantë bashkëpunimi me KFOR-in dhe forcat tjera të sigurisë.

“Ata vazhdojnë ta përsërisin se numri i forcave të tyre nuk duhet të zvogëlohet, sepse për një moment, Ballkani mund të kthehet në një zonë lufte të përgjakshme”, tha Nikoliq duke iu referuar forcave të huaja për siguri.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/nikoliq-ne-uniforem-paralajmeron-ushtaret-per-sulme-nga-kosova/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala