Nga 57 aksidente në 24 orët e fundit, 22 me të lënduar

Autori:Gazeta Fjala

Referuar kushteve atmosferike, gjendjes së rrugëve si dhe aksidenteve të raportuara gjatë 24 orëve të fundit, Policia e Kosovës nga pjesëmarrësit në trafik kërkon një vigjilencë më të shtuar dhe vozitje më të kujdesshme duke ju përshtatur gjendjes së rrugëve dhe shenjave të komunikacionit rrugor.

“Policia e Kosovës iu drejtohet të gjithë pjesëmarrësve në trafik, e në veçanti drejtuesve të automjeteve, që të respektojnë shenjat e komunikacionit rrugor si dhe t’u përshtaten kushteve atmosferike gjatë ngasjes së automjeteve, sepse tani të reshurat ndikojnë në zvogëlimin e dukshmërisë në rrugë, ku në disa akse rrugore mund të paraqiten vështirësi në qarkullimin rrugor e sidomos në orët e vona dhe ato të hershme ku mund të paraqiten edhe ngrica”, thuhet në apelin e Policisë së Kosovës.

Andaj me qëllim parandalimin e aksidenteve në komunikacionin rrugor, Policia e Kosovës vazhdon të apelojë tek të gjithë pjesëmarrësit në trafik që të respektojnë dispozitat ligjore të trafikut, të posedojnë pajisjet e nevojshme dimërore, të ju përshtaten kushteve të rrugës dhe kushteve atmosferike, pasi që këto norma ligjore janë vendosur për mbrojtjen e jetës së tyre dhe pjesëmarrësve tjerë në komunikacion, raporton Koha.net.

Ndërkaq, në raportin 24 orësh të Policisë së Kosovës është raportuar për gjithsejtë 57 aksidente të ndodhura në 24 orët e fundit, nga të cilat 22 prej tyre kanë kaluar me lëndime.

Në Prizren ditën e djeshme rreth orë 13:30 raportohet se si pasojë e mospërshtatjes së shpejtësisë së lëvizjes me kushtet e rrugës, tri automjete me targa vendore me drejtues meshkuj janë përfshirë në aksident trafiku mes veti.

Si pasojë e aksidentit, lëndime trupore ka pësuar një mashkull pasagjer në njërën nga veturat e involvuara në aksident. I lënduari pas pranimit të tretmanit mjekësorë është liruar.

Edhe në rajonin e Mitrovicës janë raportuar dy raste të aksidenteve me të lënduar. I pari ka ndodhur në fshatin Lushtë të Mitrovicës rreth 15:45 në mes veturës Ford të cilën e drejtonte i dyshuari mashkull i cili nga pakujdesia dhe mospërshtatja e shpejtësisë së lëvizjes me kushtet e rrugës, godet veturën VW kombi të cilën e drejtonte viktima mashkull.

Si pasojë e aksidentit, lëndime trupore kanë pësuar të dy drejtuesit e automjeteve dhe një pasagjer mashkull dhe të njëjti janë dërguar në QKUK për tretman mjekësor.

Kurse në fshatin Stanoc të Vushtrrisë, rreth orës 17:00, policia bën me dije se i dyshuari mashkull, derisa ishte duke drejtuar veturën Fiat, nga pakujdesia dhe mospërshtatja e shpejtësisë së lëvizjes me kushtet e rrugës, ka goditur këmbësoren -viktimën femër.

Viktima ka pësuar lëndime trupore dhe është dërguar për tretman mjekësorë në QKUK.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/nga-57-aksidente-ne-24-oret-e-fundit-22-me-te-lenduar/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala