Lajme 5 vite më parë

Mustafa:Serbia nuk fiton asgjë nga izolimi i Kosovës

Autori:Gazeta Fjala

Kryeministri i vendit, Isa Mustafa, duke folur për kundërfushatën që po e bën Serbia ndaj anëtarësimit të Kosovës në UNESCO ka thënë se Kosova e meriton anëtarësimin në këtë institucion të Organizatës së Kombeve të Bashkuara.

Kreu i Qeverisë gjithashtu ka thënë se Serbia nuk përfiton asgjë nëse Kosova mbetet e izoluar.
Këto deklarata ai i ka dhënë në një konferencë për media.

“Kosova është zotuar duke dhënë garancinë ndërkombëtare për Kishën Ortodokse Serbe. As Serbia dhe askush nuk fiton nëse Kosova mbetet e izoluar. Nuk i ndihmon paqes në Ballkan, nëse Kosova mbetet jashtë organizmave ndërkombëtare me obligime ndërkombëtare. Nuk përfiton as Serbia nëse Kosova nuk ka qasje në programet e edukimit apo në programet e mbrojtjes së ambienteve, të cilat janë ekspertizë në Kosovë”, është shprehur Mustafa, shkruan Zëri.

I pari i ekzekutivit më tej ka thënë se gjatë procesit të anëtarësimit pret përkrahjen nga shtetet që e kanë njohur Kosovën, si dhe nga disa shtete që ende nuk e kanë bërë një gjë të tillë.

“Ne presim përkrahjen nga shumë vende sikurse ato që e kanë pranuar pavarësinë e Kosovës, po ashtu edhe nga vendet e tjera”, ka shtuar Mustafa.

Kurse zëvendëskryeministri dhe ministri i Kulturës, Rinisë e Sportit, Kujtim Shala, ka thënë se Kosova mbron dhe ruan trashëgiminë e saj, andaj nuk ka arsye që të mbetet e izoluar.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/mustafaserbia-nuk-fiton-asgje-nga-izolimi-i-kosoves/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala