MPB nën hetime për asgjësimin e letërnjoftimeve biometrikë

Autori:Avdyl Pajaziti

Hetimi për asgjësimin e letërnjoftimeve biometrikë në Ministrinë e Punëve të Brendshme është duke vazhduar, të paktën kështu thonë nga prokuroria.

Zëdhënësja e Prokurorisë së Shtetit, Liridonë Kozmaqi ka thënë për Indeksonline se rasti është duke u hetuar nga Departamenti i Krimeve të Rënda në Prokurorinë Themelore në Prishtinë.

“Ju informoj se rasti gjendet në fazën hetimore në Departamentin e Krimeve të Rënda në Prokurorinë Themelore në Prishtinë. Në këtë rast tani janë duke u ndërmarrë të gjitha veprimet e nevojshme hetimore, mirëpo në këtë fazë hetimore Prokuroria nuk mund të bëj publike informata shtesë”, ka thënë Kozmaqi.

Ajo më pas ka theksuar se pas grumbullimit të të gjitha provave, prokurori i çështjes do të vendosë pastaj për ngritje apo jo të aktakuzës.

“Gjithsesi, pas grumbullimit të të gjitha provave, gjegjësisht pas përfundimit të hetimeve prokurori i çështjes vlerëson se a ka prova të mjaftueshme, të cilat paraqesin dyshim të bazuar mirë se a është kryer vepër penale apo jo dhe pastaj do të vendosë për ngritje ose jo të aktakuzës”, u shpreh Kozmaqi.

Muaj më parë ish menaxheri i prodhimit të dokumenteve në Ministrinë e Punëve të Brendshme, Besnik Berisha ka pretenduar se kjo ministri e ka dëmtuar buxhetin e shtetit hiq më pak se 50 mijë euro me asgjësimin e letërnjoftimeve biometrikë me qëllim që të fshihen gabimet me rastin e prodhimit të tyre./Indeksonline/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/mpb-nen-hetime-per-asgjesimin-e-leternjoftimeve-biometrike/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala