Milaim Zeka deklarohet i pafajshëm

Autori:Avdyl Pajaziti

Milaim Zeka e Rrustem Rukolli janë deklaruar të pafajshëm lidhur me akuzat me të cilat ngarkohen.

Pasi prokurori Romulo Mateus lexoi aktakuzën, kryetarja e trupit gjykues i pyeti dy të akuzuarit se a e kanë kuptuar se për çfarë akuzohen dhe si ndihen në lidhje me akuzat.

Të dy, Milaim Zeka dhe Rrustem Rukolli thanë se ndihen të pafajshëm dhe e kanë të qartë aktakuzën.

Sipas prokurorit, Rukolli ia ka dhënë Zekës shkresat e lëndës PP 27/12, ndërsa në bazë të atyre shkresave Milaim Zeka është takuar me një dëshmitar të mbrojtur për ta bindur atë që t’i shfajësojë të akuzuarit e kësaj lënde.
Lënda PP 27/12 lidhet me aktakuzën ndaj “Grupit Drenica”.

Rrustem Rukolli duke e shfrytëzuar mundësinë e tij si njëri nga përfaqësuesit në ekipin mbrojtës të Sami Lushtakut dhe duke i pasur të gjitha shkresat e prokurorisë në lëndën PP 27/12, këto informata ia ka përcjellë Milaim Zekës, i cili më pas e ka takuar dëshmitarin e koduar si ‘Dëshmitari I’ në atë rast dhe në restorantin ‘Dibra’ në Skenderaj në prezencën e një numri të madh të njerëzve ka tentuar që ta bindë atë që të shfajësojë ata të akuzuar,” tha prokurori gjatë leximit të aktakuzës.

Prokurori bëri të ditur se takimet e Zekës me “Dëshmitarin I” ndodhën “nga 28 tetori deri më 5 nëntor 2013”.

Prokurori shprehu bindjen se do të vërtetojë gjatë gjykimit fajësinë e të akuzuarve.

“Prokuroria do të ofrojë prova të pakontestueshme me të cilat vërteton se Milaim Zeka nuk ka vepruar i vetëm në këtë rast dhe se kishte interesim të madh për të gjitha shkresat në lëndën e ‘Grupit të Drenicës’. Gjithashtu audio-incizimet dhe thirrjet e tij telefonike dëshmojnë se ai është ndihmuar nga Rrustem Rukolli për t’i pasur shkresat e lëndës,” tha prokurori.
Seanca është duke vazhduar. /Kallxo.com/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/milaim-zeka-shpallet-i-pafajshem/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala