Mërgimtarët mund të regjistrohen në çdo qytet të Kosovës

Autori:Avdyl Pajaziti

Ministra e Diasporës filloi fushatën për promovimin e regjistrit të diasporës. Bashkatdhetarët që vizitojnë Kosovën, do të kenë mundësi që të kryejnë regjistrimin në ekipet mobile në të gjitha qytetet e Kosovës.

Fushata do të zgjasë tre muaj me aktivitete të ndryshme në të gjithë territorin e Kosovës. Ministria e Diasporës, përmes kësaj fushate ka për qëllim që shqiptarët që jetojnë e veprojnë në mërgatë t’i sjellë më afër atdheut të tyre.

Sipas ministrit të Diasporës, Valon Murati, të dhënat që dalin nga ky proces i regjistrimit, do të ndihmojnë në krijimin e politikave më të dobishme shtetërore, e që janë në të mirë të diasporës.

Hapja zyrtare e fushatës për promovimin e regjistrit të diasporës u bë sot në Prishtinë, ku e pranishme qe dhe presidentja e vendit, Atifete Jahjaga.

Me sloganin “Ti je pjesë e atdheut” që ka kjo fushatë këtë vit, ministri Murati tha se diaspora ka qenë dhe do të mbetet ndër shtyllat kryesore të mbijetesës politike.

Ai tha se procesi i regjistrit të diasporës nuk ka të bëjë vetëm me regjistrin demografik e të dhënat statistikore të cilat mungojnë.

“Këto të dhëna që do të dalin nga ky proces do të na ndihmojnë në krijimin e politikave më të favorshme shtetërore në të mirë të diasporës. Përmes këtij procesi, ne do të dijmë sa është potenciali ynë jashtë territorit tonë dhe si rrjedhim ne do të mund të hartojmë politika më të sakta e më të drejta, si në fushën e mësimit plotësues të gjuhës dhe kulturës, ashtu edhe të avancimit te të drejtave civile dhe politike të diasporës, si në vendin tonë ashtu edhe në vendet ku jetojnë, përmes inkuadrimit në jetën politike dhe publike”, tha ai.

Gjithashtu, sipas Muratit, këto të dhëna do të ndihmojnë për identifikimin e potencialit intelektual, profesional dhe financiar të diasporës, si vlerë e jashtëzakonshme e zhvillimit shoqëror dhe ekonomik të vendit, për përfitim të dy anshëm.

Fushata për regjistrin e diasporës mbështetet nga projekti “Përfshirja e diasporës në zhvillim ekonomik”, i financuar nga Ministria e Punëve të Jashtme e Finlandës, e që zbatohet nga UNDP dhe IOM në Kosovë.

E thirrje bashkatdhetarëve që t’i bashkohen këtij procesi, iu bëri edhe përfaqësuesi rezident i UNDP-në në Kosovë Andrew Russell.

Partneritetin me Ministrinë e Diasporës ai e cilësoi si shumë të rëndësishëm.

Për këtë fushatë, Ministria e Diasporës ka rekrutuar rreth 100 zyrtarë, që do të përkujdesen për mikpritjen dhe regjistrimin e pjesëtarëve të diasporës gjatë kohës së qëndrimit që tyre në atdhe.

Përveç regjistrimit, bashkatdhetarët do të mund të pajisen edhe me informacione rreth procedurave administrative. /Telegrafi/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/mergimtaret-mund-te-regjistrohen-ne-cdo-qytet-te-kosoves/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala