Luftëtarët e Koshares: Të dënuarit nga Serbia të mbrohen institucionalisht

Autori:Avdyl Pajaziti

Shoqata e Veteranëve të Luftës së Koshares kanë reaguar sot ndaj vendimit të Gjykatës së Lartë të Nishit e cila ka dënuar me burgim dhjetë ish luftëtarë të kësaj Brigade.

“Ne, si ish luftëtarë të Brigadës 138 ‘Agim Ramadani’ shprehim shqetësimin dhe revoltën tonë ndaj vendimit të një trupe gjykuese, mobile e kontrabanduar nga Prokuroria dhe Gjykata e Nishit në pjesën veriore të Komunës së Mitrovicës, që dënon me vendim të formës së prerë, me masë burgimi prej 16 vitesh bashkëluftëtarët tonë: Rrustem Berisha, Anton Quni, Xhafer Gashi, Shiqer Maloku, Demë Maloku, Demush Gacaferi, Agron Jusufi dhe Rabit Alija”, thuhet në reagimin e kësaj Shoqate.

Veteranët e luftës në Koshare konsiderojnë se ky veprim i gjyqësisë serbe, është jashtë realitetit politik dhe juridik të Kosovës në raport me shtetet fqinje përfshirë edhe Serbinë.

Siç potencohet në reagim, statusi juridik ndërkombëtar politik dhe shtetëror i Republikës së Kosovës, që derivon nga marrëveshjet ndërkombëtare si: e Rambujesë, Pakoja e Ahtisarit dhe Kushtetuta e Ahtisarit, pastaj statusi i Pavarësisë së Kosovës dhe identiteti i saj shtetëror kushtetues, e shkëpusin tërësisht sistemin juridik të Kosovës nga juridiksioni i Serbisë.

“Qytetarët e Republikës së Kosovës i nënshtrohen vetëm drejtësisë dhe legjislacionit pozitiv të vendit tonë, drejtësia dhe gjyqësia serbe është jashtë kontekstit juridik dhe shtetëror, sipas të cilit ajo funksionon sot”, thuhet tutje në reagimin e veteranëve të Koshares.

“Sistemi juridik RFJ-së, mbi bazën e të cilit janë ngritur këto pretendime për penalizim, është një sistem i skaduar, pozitiviteti i të cilit është kontestuar me luftën çlirimtare-mbrojtëse të popullit të Kosovës. Prandaj, si i tillë, nuk përben bazë për veprim juridik ndaj qytetarëve që takojnë me një realitet të ri politiko-shtetëror”, thuhet në reagim.

Veteranët e Koshares kërkojnë nga organet shtetërore të Kosovës, që në koordinim me faktorin ndërkombëtar të tejkalojnë këto veprime me karakter provokues dhe që cenojnë liritë dhe drejtat e qytetarëve të Kosovës.

“Në ketë kontekst, kërkojmë nga Qeveria dhe nga ministria përkatëse, që ky vendim i gjyqeve të kontrabanduara të Serbisë, të shpallet i pavlefshëm NULL dhe qytetarët ish luftëtarë të apostrofuar, tani më bartës të detyrave dhe përgjegjësive publike, të merren në mbrojtje nga institucionet vendore dhe sistemi juridik i Kosovës”, thuhet në reagimin e Shoqatës së veteranëve të luftës së Koshares.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/luftetaret-e-koshares-te-denuarit-nga-serbia-te-mbrohen-institucionalisht/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala