Liberalizimi i vizave esencial për stabilitet në vend

Autori:Avdyl Pajaziti

Demarkacioni me Malin e Zi, ka qenë kriter për marrjen e udhërrëfyesit për liberalizimin e vizave, sikurse që marrëveshja për asociacionin e komunave serbe është produkt i procesit të Brukselit. Këto dy marrëveshje sot po përdoren nga partitë opozitare si arsyet kryesore për bllokimin e punës së Kuvendit.

Të gjitha këto marrëveshje janë në kuadër të agjendës evropiane të Kosovës. Kështu thonë burime ndërkombëtare të Indeksonline, sipas të cilave BE-ja nuk duhet vonuar në shpërblimin e Kosovës, sepse çfarëdo vonesë e tyre mund të rris edhe më shumë frustrimin e qytetarëve, i cili po tentohet të manipulohet dhe keqpërdorët nga partitë e opozitës.

“Vonesat e BE-së për shpërblimin e Kosovës ka rritur pakënaqësinë te qytetarët dhe mosbesimin e tyre tek Qeveria se procesi i Brukselit dhe këto marrëveshje me të vërtet po e sjellin vendin më afër BE-së, siç ka premtuar Qeveria, por edhe vetë shtetet anëtare të BE-së”, thotë një përfaqësues diplomatik i huaj, sipas të cilit këto shqetësime i kanë adresuar edhe në Bruksel.

Sipas këtyre burimeve, përderisa MSA do të jetë një hap kyç në agjendën evropiane, kjo marrëveshje nuk është e prekshme për qytetarët, por liberalizimi i vizave është vital për stabilitetin në vend dhe kredibilitetin e reformave të nxitura nga Bashkimi Evropiane. Qytetarët e Kosovës janë të vetmit në rajon pa të drejtë të lëvizjes së lirë në shtetet e zonës schengen dhe kjo situatë po rëndon gjendjen në Kosovë. Tre vendimet e vështira që kjo Qeveri ka marrë sivjet, si Gjykata Speciale, krijimi i Asociacionit të Komunave Serbe dhe demarkimi i kufirit me Malin e Zi, të gjitha të ndërlidhura me agjendën evropiane kanë provokuar një situatë të vështirë dhe stabiliteti pa karotat e BE-së do të jetë sfidues për t’u mirëmbajtur.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/liberalizimi-i-vizave-esencial-per-stabilitet-ne-vend/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala