LDK nesër e voton Kryesinë – nuk janë pjesë Vjosa Osmani e Arben Gashi

Autori:Avdyl Pajaziti

Lidhja Demokratike e Kosovës nesër voton anëtarët e rinj të Kryesisë së Partisë. Isa Mustafa do t’i bëjë propozimet për anëtarët e këtij organi të LDK-së. Aty, do të jenë emrat e ministrave aktual, ndërsa, s’do të ketë vend për Vjosa Osmanin e Arben Gashin.

Isa Mustafa do t’i shkojë deri në fund betejës për t’i larguar nga organet partiake të LDK-së, Arben Gashin e Vjosa Osmanin.

Këta dy deputetë nuk do të propozohen nesër në mbledhjen e Këshillit të Përgjithshëm as për anëtarë të Kryesisë së LDK-së.

Ata s’kanë arritur të bëhen as pjesë e Këshillit të Përgjithshëm të kësaj partie pasi dolën kundër kandidaturës së Kryeministrit për Kryetar të LDK-së.

Nënkryetari në largim i LDK-së, Haki Rugova, ka treguar për Gazetën Express, se nesër do të mbahet mbledhja e Këshillit të Përgjithshëm të LDK’së ku do të vendoset për Kryesinë e re të partisë.

“Jo ende nuk është zgjedhur Kryesia por nesër është mbledhja e Këshillit të Përgjithshëm do të vendoset”, ka shtuar Haki Rugova.

Ky zyrtar i LDK-së s’ka treguar se kush do të jetë në organin vendimmarrës të LDK’së.

“Nesër Kryetari Mustafa do t’i propozojë emrat dhe më pas ne i votojmë. Ende nuk dihet kush do të jetë në Kryesi”, ka thënë ai.

Deri më tash dihet se Lutfi Haziri do të ngjitet në pozitën e Nënkryetarit. Të njëjtën pozitë pritet ta ketë edhe Agim Veliu.

Ndërkohë, Ismet Beqiri do të degradohet në hierarkinë partiake. Në vend të tij, pritet të propozohet Arban Abrashi, Ministër në Qeverinë Mustafa.

Edhe Ministrat tjerë të LDK-së do të propozohen për anëtar të Kryesisë.

Ndërkohë, nuk dihet se kush do ta zë pozitën e Teuta Sahtaqisë, e cila ka mbetur jashtë të gjitha strukturave të LDK-së.

Në kryesinë e kaluar të LDK-së ishin: Isa Mustafa, Sabri Hamiti, Teuta Sahatçiu, Haki Rugova, Ismet Beqiri, Hanefi Muharremi, Agim Veliu, Vjosa Osmani, Skender Hyseni, Lutfi Haziri, Sanije Aliu, Gazmend Muhaxheri, Naser Osmani, Ramë Manaj, Abdullah Hoti, Lirie Kajtazi, Xhafer Tahiri, Kujtim Shala, Arsim Janova, Sali Morina, Fevzi Berisha e Anton Quni.

Zgjedhjet në LDK janë mbajtur para një muaji. Aty është rizgjedhur Isa Mustafa Kryetar me aklamacion dhe duartrokitje. Mustafa e ka marrë udhëheqjen e LDK-së në nëntor të vitit 2009 dhe prej atëherë ka shënuar tri humbje të mëdha. I ka humbur dy palë zgjedhje nacionale si dhe ka humbur garën për Kryetar të Prishtinës. Sidoqoftë, pas zgjedhjeve të fundit nacionale, Mustafa arriti t’i shpëtojë dorëheqjes falë koalicionit paszgjedhor me AAK-në dhe NISMA-n. Pas dështimit të koalicionit LDK, AAK, NISMA, Mustafa u hodh të përqafim të Thaçit, i cili pastaj e bëri Kryeministër. /Express/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/ldk-neser-e-voton-kryesine-nuk-jane-pjese-vjosa-osmani-e-arben-gashi/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala