LDK akuzon Shpend Ahmetin se nuk po e përfill planin e punës së Kuvendit

Autori:Avdyl Pajaziti

Grupi i këshilltarëve të Lidhjes Demokratike të Kosovës në Kuvendin e Prishtinës përmes një komunikate për media thotë se Shpend Ahmeti nuk është duke përfillur planin e Kuvendit komunal, ngaqë deri më tani siç thotë LDK nuk është mbajtur mbledhja e Kuvendit, e cila do të duhej të mbahej deri më tani.

Grupi i LDK-së në Kuvendin e Prishtinës konsideron se kryetari i kryeqytetit Shpend Ahmeti e ka obligim që të nxjerrë para Kuvendit Raportin e Auditorit të Përgjithshëm dhe Raportin Gjashtëmujor të Punës.

Por, një gjë të tillë deri më tani LDK thotë se nuk e ka bërë.

“Përveçse nuk e përfilli planin e punës së Kuvendit, që e ka përkrahur vetë, kryetari Ahmeti nuk shfaqi gatishmërinë, veç tjerash, të paraqesë Raportin për gjashtëmujorin e punës së tij dhe Raportin e Auditorit të Përgjithshëm, që është obligim ligjor. Të dyja këto janë kërkesa që dalin nga ligjet përkatëse në fuqi”, thuhet në komunikatën e LDK-së.

Grupi i LDK-së e fton kryetarin Ahmeti që ta bëjë publik Raportin e Punës për periudhën 6 mujore të vitit 2015.

Por sipas informacioneve që ka grupi i LDK – së, thotë se administrata e kryetarit Ahmeti ka dështuar t’i realizojë pro jektet sipas planit buxhetor, sidomos ka dështuar në realizimin e projekteve kapitale, me vetëm 8,85% të investimeve në periudhën 1 janar – 30 qershor 2015.

Grupi i LDK-së konsideron se dështimi i qeverisjes, i transparencës ndaj qytetarëve dhe i demokracisë në kryeqytet, është dhe mbetet shkaku i shmangies së kryetarit të Prishtinës nga debati në Kuvendin e Komunës, tani e 7 muaj.

Grupi i LDK-së në Kuvendin e Prishtinës thotë se pas çfarëdo beteje politike në Prishtinë, të shkaktuar nga udhëheqja e Komunës, po bllokohet zhvillimi i demokracisë dhe zhvillimi i kryeqytetit.

“Bojkoti, humbja dhe dështimi po shkaktohet nga një qeverisje përjashtuese dhe jotransparente e kryeqytetit, qeverisje kjo e kryetarit të Komunës Shpend Ahmeti”, thuhet në komunikatë.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/ldk-akuzon-shpend-ahmetin-se-nuk-po-e-perfill-planin-e-punes-se-kuvendit/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala