Kryeministri Mustafa uron që 2016-ta të jetë vit i mirëkuptimit tonë (Video)

Autori:Avdyl Pajaziti

Kryeministri Isa Mustafa nëpërmjet një videoje ka uruar të gjithë qytetarët e Kosovës me rastin e Vitit të Ri.

“Të dashur qytetarë të Kosovës! Në këtë festë tradicionale,  në natën e ndërrimit të viteve, kam nderin dhe kënaqësinë e veçantë, që në emër të Qeverisë së Republikës së Kosovës t’i dëshiroj urimet më të përzemërta të gjithë qytetarëve të Kosovës.
Ju uroj gëzuar Vitin e Ri të gjithë fëmijëve të Kosovës, të cilët i gëzohen aq shumë festave, e posaçërisht Vitit të Ri dhe atmosferës ngazëlluese dhe unike që krijohet me këtë rast.
I uroj gëzuar të rinjve të Kosovës, të cilët përbëjnë shumicën dërrmuese të shoqërisë, dhe që, përkundër vështirëve, nuk e humbën për asnjë moment optimizmin dhe vullnetin e tyre të mirë për Kosovën.
Uroj prindërit, motrat, vëllezërit tanë anekënd Kosovës, dhe të gjithë bashkatdhetarët tanë në diasporë.
Gëzuar Vitin e Ri i urojmë edhe miqve tanë ndërkombëtarë,  të cilët po e ndihmojnë Kosovën për të ecur përpara”, ka thënë Mustafa.

Mustafa ka numëruar disa nga sukseset e Qeverisë në vitin 2015, ndërsa ka deklaruar se ata po ashtu janë përballur me shumë sfida dhe situata të paparashikuara.

“Motra dhe vëllezër, jam besimplotë se Viti i Ri 2016, do të jetë vit i punës, shpresës dhe besimit. Vit i mirëkuptimit tonë!
Është çasti më i duhur që të reflektojmë së bashku dhe që me forcën e vullnetit me të cilën fituam lirinë dhe krijuam shtetin, të angazhohemi që ta bëjmë Republikën e Kosovës anëtare të denjë të familjes së madhe evropiane”.

“Të dashur bashkëqytetarë të vendit tim, kam kënaqësinë që  t’ju uroj nga zemra Gëzuar Viti i Ri 2016! Zoti e bekoftë Republikën e Kosovës!”, e ka përmbyllur fjalën e tij Mustafa.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/kryeministri-mustafa-uron-qe-2016-ta-te-jete-vit-i-mirekuptimit-tone-video/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala