Kosova do të anëtarësohet në UNESCO

Autori:Avdyl Pajaziti

Drejtoresha e Këshillit Britanik në Kosovë, Arjeta Emra, ka thënë se ky këshill është duke punuar maksimalisht për anëtarësimin e Kosovës në UNESCO.

 

Ajo ka bërë me dije se Këshilli Britanik, i cili prej vitesh është partner i MPJ-së për avancimin e diplomacisë publike, tashmë ka dizajnuar aktivitetet dhe ka identifikuar partnerët për arritjen e këtij synimi.

Në këtë intervistë për “Epokën e re”, Emra ka deklaruar se, krahas anëtarësimit në UNESCO, ky këshill është duke punuar maksimalisht edhe në drejtim të nënshkrimit të MSA-së dhe anëtarësimit në organizata të tjera.

“Tanimë aktivitetet janë dizajnuar, partnerët janë identifikuar dhe kemi ide të qartë se çfarë dëshirojmë të arrijmë në muajt e ardhshëm. Normalisht, fokusi do të jetë në UNESCO dhe te nënshkrimi i marrëveshjes së MSA-së”, ka thënë Emra.

Ajo ka shprehur optimizëm se në këtë synim diplomacia e Kosovës me partnerët e saj do ta mposhtim diplomacinë serbe. “Kemi shumë optimizëm në këtë drejtim. Normalisht se diplomacia serbe do ta bëjë punën e vet, por edhe ne do ta bëjmë punën tonë. Kështu funksionon diplomacia.

Me rëndësi është që aplikimi i Kosovës është aty dhe ka hyrë në agjendë të diskutimit. Zëvendësministri Selimi ka bërë punë të shkëlqyer në këtë drejtim dhe ai e udhëheq këtë proces”, është shprehur Emra.

Duke folur për projektin e përbashkët të këtij këshilli me MPJ-në: “Komunikimi me Evropën nëpërmjet diplomacisë”, ajo ka deklaruar se rezultatet e këtij projekti janë të prekshme. Emra ka vlerësuar se ky projekt ka ndihmuar në zbutjen e qëndrimit të vendeve të BE-së që ende nuk e kanë njohur Kosovën.

“Ky pozicion na mundëson që Kosova të mos bllokohet në nismat rajonale dhe evropiane. Nëse i keni përcjellë nismat vitet e fundit, asnjëra nga këto shtete nuk e ka bllokuar Kosovën në rrugën e saj drejt proceseve evropiane. Normalisht se kjo nuk ka ardhur vetvetiu, por është bërë shumë punë me këto shtete që të arrijmë deri këtu. Puna me këto shtete ka qenë e gjatë dhe e vështirë. Secili nga pesë shtetet është trajtuar ndaras, sepse edhe pozicioni i tyre ndaj Kosovës është shumë i ndryshëm”, ka deklaruar Emra, duke shtuar se, përveç Spanjës, bashkëpunimi me katër shtetet e tjera anëtare të BE-së tani ndodh në nivel të shoqërisë civile, artistëve, deputetëve dhe politikanëve. (Intervistën e plotë mund ta lexoni në numrin e sotëm të gazetës “Epoka e re”)

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/kosova-do-te-anetaresohet-ne-unesco/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala