Kinezët marrin 30 mijë tonë klinker në Shqipëri

Autori:Avdyl Pajaziti

Një anije me gjatësi 200 metra, që do të ngarkohet me rreth 30 mijë tonë klinker për eksport, është ankoruar  në portin e Durrësit. Sipas të dhënave të dispeçerisë portuale, anija kineze “Jia Ning Shan” është mjeti lundrues që merr ngarkesën më të madhe për eksport që nga fillimi i vitit 2014.

ATSH njofton se nga të njëjtat burime mësohet se katër anije të tjera të mëdha që kanë marrë ngarkesa nga 16 mijë deri në 27 mijë tonë secila, janë ankoruar që nga fillimi i muajit janar në kalatën 11 të portit të Durrësit. Anijet e mëdha ngarkohen kryesisht me klinker, lëndë e parë për prodhimin e çimentos, e cila vjen nga fabrikat pranë Fushë Krujës dhe transportohet kryesisht drejt porteve të Afrikës Veriore. Nuk kanë munguar edhe ngarkesat me hekur-nikel e krom, apo anijet e mëdha të cilat kanë sjellë qymyr apo skrap.

Që nga fillimi i vitit 2014, në portin e Durrësit janë përpunuar 33 anije me ngarkesa nga 10.000 – 28.000 tonë. Më të mëdhatë, përkatësisht Sunbay dhe Thor Indipendent, janë ngarkuar me nga 28 mijë tonë secila, përkatësisht hekur-nikel dhe klinker. Anija kineze “Jia Ning Shan” pritet të ngarkohet me rreth 30 mijë tonë klinker, sasia më e madhe që nga fillimi i vitit të kaluar.

Menjëherë pas ankorimit, të shtunën paradite ka nisur procesi i ngarkimit të anijes kineze. Në portin e Durrësit po përpunohen edhe dy anije të tjera me afro 10.300 tonë grurë gjithsej.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/kinezet-marrin-30-mije-tone-klinker-ne-shqiperi/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala