Kim Mehmeti: Bashkimi kombëtar është më i vështirë se çlirimi i Kosovës

Autori:Avdyl Pajaziti

Shkrimtari dhe publicisti, Kim Mehmeti ,mendon se bashkimi i shqiptarëve është i arritshëm por se pranon që si proces është më i vështirë sesa çlirimi i Kosovës nga Serbia. Ai ka thënë se kundërshtarët më të mëdhenj të këtij bashkimi janë vet udhëheqësit politikë shqiptarë.
“Po, do të doja që Edi Rama sa më shpejt t’i bashkojë Kosovë e Shqipëri. Në mos hiçgjë tjetër, atëherë shkaku se ashtu të bashkuara, do të dërgojnë në Maqedoni ambasador që do të interesohet edhe për shqiptarët e këtushëm, e jo vetëm për shijen e qebapëve në Çarëshinë e Vjetër të Shkupit. Pra, e ndërroj bashkimin mes Shqipërisë e Kosovës, edhe pse e di se ai do të jetë më i vështirë sesa çlirimi i Kosovës nga Serbia, ngaqë kundërshtarët e këtij bashkimi do të jenë gjithë kryesuesit e ‘sulltanpartive’ që plaçkitin Kosovën e Shqipërinë”, ka thënë Mehmeti në një intervistë për gazetën Epoka e Re.

I pyetur për reagimet e përfaqësuesve të BE-së, por dhe të SHBA-ve, lidhur me deklaratat e kryeministrit Edi Rama për bashkim kombëtarë, Mehmeti thotë se ato reagime i ka parë si “tallje me politikanët tanë”.

“Mos vallë ju mendoni se Washingtoni e Brukseli aq nuk i njohin drejtuesit tanë në Prishtinë e Tiranë, sa mos e dinë se shqiptarët edhe mund r’i bashkosh, por jo edhe përfaqësuesit e “principatave” të tyre politike, jo edhe këta grindavecë që nuk mund t’i mbash mbyllur as në një sallë ku çdonjëri e ka ulësen e vet. Por sido që të jetë, ne si shqiptarë nuk duhet të lejojmë të vdesë ëndrra për një popull, një gjuhë e një shtet”!

“Nëse lejojmë të zhbëhet kjo ëndërr, atëherë do të mbetemi pa të nesërme. Ajo ëndërr do të realizohet, por atë nuk mund ta realizojnë elitat tona të sotme politike, të cilat më shumë e duan pushtetin sesa shtetin e popullin e vet”.

Sipas Mehmetit, kundërshtarët më të mëdhenj të bashkimit të shqiptarëve, janë vet udhëheqësit politikë shqiptarë.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/kim-mehmeti-bashkimi-kombetar-eshte-me-i-veshtire-se-clirimi-i-kosoves/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala