Jahjaga vlerëson ratifikimin e MSA-së, kërkon fillimin e reformave të thella

Autori:Avdyl Pajaziti

Presidentja e Kosovës, Atifete Jahjaga, ka qenë edhe vetë pjesëmarrëse në seancën e Kuvendit të Kosovës, në të cilën është ratifikuar Marrëveshja e Stabilizim-Asociimit me Bashkimin Evropian.

Menjëherë pas ratifikimit, Presidenca ka lëshuar një komunikatë nëpërmjet së cilës ka vlerësuar se përtej simbolikës së fuqishme të orientimit proevropian, ratifikimi i MSA-së duhet të shihet si fillim i një përkushtimi institucional dhe shoqëror për reforma të thella, të cilat do të forcojnë demokracinë tonë të brendshme dhe do ta përmirësojnë nivelin e qeverisjes dhe standardin e jetesës për secilin qytetar.

“Kjo ditë dikur na dukej e paimagjinueshme dhe paarritshme. Kjo ditë erdhi. Kjo ditë është për gjeneratën e re të Republikës së Kosovës, për të gjitha mundësitë që atyre do t’iu ofrohen për të pasur një të ardhme të sigurt. Ky ratifikim është një garanci për të gjithë ata prindër që shpeshherë janë ndier të pasigurt për të ardhmen e fëmijëve të tyre në këto vite tranzicioni dhe shtetndërtimi. Bashkë, me shumë sakrificë dhe shumë mund, po i arrijmë të gjitha, një nga një”, shkruar ndër tjerash Jahjaga.

Ja deklarata e plotë:

Deklaratë e Presidentes Jahjaga me rastin e ratifikimit të Marrëveshjes së Stabilizim Asociimit në Kuvendin e Kosovës

Ishte nder dhe privilegj që të jem sot dëshmitare e ratifikimit të Marrëveshjes së Stabilizim Asociimit ndërmjet Kosovës dhe Bashkimit Evropian, këtij momenti të rëndësishëm për Kosovën dhe për të ardhmen e saj evropiane.

Sot u bashkuam, pavarësisht dallimeve tona e orientimit tonë politik, të përgjegjshëm për peshën historike të këtij momenti. E hodhëm bashkërisht këtë hap jetik për qytetarët e Republikës së Kosovës, për forcimin e perspektivës evropiane të shtetit tonë dhe nisëm rrugën e pakthyeshme për ta bërë Kosovën anëtare të Bashkimit Evropian.

Ky rrugëtim vazhdon të jetë plot sakrifica dhe ne duhet të jemi të vëmendshëm për listën e gjatë të prioriteteve që na presin për ta bërë Republikën e Kosovës vend kandidat për anëtarësim në Bashkimin Evropian. Ne ende jemi duke e konsoliduar shtetësinë e Kosovës, ende jemi duke e forcuar sovranitetin tonë, ende jemi duke u përballur me sfidat e tranzicionit të cilat po vërehen më së shumti në mangësitë në sundimin e rendit dhe ligjit, sistemin tonë arsimor dhe atë të shëndetësisë.

Përtej simbolikës së fuqishme të orientimit proevropian, ratifikimi i MSA-së duhet të shihet si fillim i një përkushtimi institucional dhe shoqëror për reforma të thella, të cilat do të forcojnë demokracinë tonë të brendshme dhe do ta përmirësojnë nivelin e qeverisjes dhe standardin e jetesës për secilin qytetar.

Kjo ditë dikur na dukej e paimagjinueshme dhe paarritshme. Kjo ditë erdhi. Kjo ditë është për gjeneratën e re të Republikës së Kosovës, për të gjitha mundësitë që atyre do t’iu ofrohen për të pasur një të ardhme të sigurt. Ky ratifikim është një garanci për të gjithë ata prindër që shpeshherë janë ndier të pasigurt për të ardhmen e fëmijëve të tyre në këto vite tranzicioni dhe shtetndërtimi. Bashkë, me shumë sakrificë dhe shumë mund, po i arrijmë të gjitha, një nga një.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/jahjaga-vlereson-ratifikimin-e-msa-se-kerkon-fillimin-e-reformave-te-thella/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala