Ilir Deda i shkruan Presidentes

Autori:Avdyl Pajaziti

Anëtari i Lëvizjes Vetëvendosje, Ilir Deda, i ka shkruar një letër të hapur Presidentes të Kosovës, Kryetarit të Kuvendit dhe Kryeministrit.

Kjo është letra e tij:

15 tetor, 2015
Prishtinë

E nderuara Presidente e Republikës së Kosovës,
I nderuar Kryetar i Kuvendit,
I nderuar Kryeministër,

Republika e Kosovës ka hyrë në rrugën e rrezikimit serioz të shtetësisë sonë. Konflikti brendashqiptar është gjëja e fundit që i duhet popullit tonë, ndërsa thyerja e tanishme zhvlerëson përpjekjet dhe flijimin e brezave të tërë në angazhimin e tyre për liri.

Përkundrazi, liria dhe shteti janë menduar të jenë kuptimplota, me jetë cilësore të qytetarëve të Republikës së Kosovës, me zhvillim ekonomik e shoqëror, me drejtësi si dhe me Kosovën e rreshtuar me Perëndimin dhe vlerat demokratike.

Është e pakuptimtë mungesa e përgjegjësisë për veprime të matura politike tani, dhe përgjegjësia më e madhe bie mbi ju si përgjegjësit kryesor institucionalë të shtetit tonë.

Kriza e tanishme buron nga shkelja e vullnetit të popullit tonë për ndryshime qeverisëse, si dhe nga mungesa e konsensusit politik për zgjidhjet që burojnë nga procesi i Brukselit. Është e qartë se kriza politike në Kosovë nuk mund të zgjidhet me debat në Kuvendin e Republikës.

Ne rrezikojmë të futemi në thyerje të mëdha të brendshme, që nuk do të na e falte as historia, as e ardhmja. Asnjë proces ndërkombëtar nuk e vlen të rezultojë me shkatërrimin e Kosovës së pavarur. Në këto momente të rrezikimit të shtetit tonë dhe sfidimit më serioz të lirisë në të, jeni të thirrur që të merrni përgjegjësi e lidership për tejkalimin e gjendjes, për arritjen e konsensusit politik si dhe për arritjen zgjidhjeve konsensuale për çështjet kyçe politike në vend. Kjo përgjegjësi bie mbi ju, bartësit më të lartë institucionalë, politikë e shtetërorë në Kosovë.

Apeloj që sa më parë të thirrni në tryezë politike liderët e partive politike për arritjen e konsensusit të Qeverisë dhe opozitës për dalje nga situata e rëndë në të cilën gjendemi. Ky dialog duhet të bëhet pa kushte, pa qëndrime rigide dhe pa përjashtime të zgjidhjeve të mundshme konsensuale. Ndërsa rezultatet e këtij dialogu duhet të miratohen nga Kuvendi i Republikës së Kosovës.

Nëse humbet ky moment dhe kjo mundësi, nesër do të jetë shumë vonë. Pasojat për shtetin dhe popullin tonë do të jenë të tilla që do t’i turpërojnë gjeneratat e ardhshme. Tash është momenti i fundit për veprime të arsyeshme politike, ndërsa kahu i zhvillimeve në Kosovë varet plotësisht nga veprimet tuaja sot. Këtë e keni obligim, jo vetëm njerëzor e institucional, por edhe historik.

Sinqerisht,

Ilir Deda
Deputet i Kuvendit të Republikës së Kosovës

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/ilir-deda-i-shkruan-presidentes/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala