Hetimet për rastin e Liqenit të Badovcit drejt fundit (Video)

Autori:Avdyl Pajaziti

Hetimet ndaj pesë të arrestuarve në afërsi të liqenit të Badovcit në verë të këtij viti janë afër përfundimit, ka thënë një prokurore e Prokurorisë Speciale të Kosovës.

Drita Hajdari, e cila është duke e hetuar rastin në të cilin pesë të arrestuarit dyshohen për terrorizëm, ka thënë se organi i ndjekjes është duke pritur disa ekzaminime nga Agjencia e Forenzikës për ta kompletuar dosjen ndaj këtyre të arrestuarve.

Besnik Latifi, Gazmend Haliti, Milazim Haxhiaj dhe Fehmi Musa ishin arrestuar nga Policia e Kosovës në mesnatës e 11 korrikut në afërsi të liqenit që furnizon me ujë një pjesë të Prishtinës, nën dyshimin se ishin duke përgatitur një akt terrorist te diga e liqenit.

Që nga atëherë, liqeni është vënë nën masa të shtuara të sigurisë.

“Hetimi është në fazën përfundimtare, jemi duke i pritur edhe disa ekzaminime nga Agjencia e Forenzikës. Unë nuk mund ta përfundoj rastin deri sa t’i marrim ato, me vetë faktin që kemi sekuestruar disa pajisje elektronike dhe ato duhet të verifikohen, përndryshe jemi në përfundim e sipër”, ka thënë prokurorja Hajdari për KALLXO.com.

Ndërsa avokatja Sabrije Jashari, mbrojtëse e njërit nga të dyshuarit ka thënë se nuk është në dijeni për fazën aktuale të hetimeve.

Ajo ka shtuar se së fundi ka pasur një kërkesë të refuzuar nga Gjykata e Apelit lidhur me masën e paraburgimit për të mbrojturin e saj.

Ndërsa avokati tjetër, Bajram Tmava, thotë se është në pritje të veprimit të prokurores në këtë rast.

“Përderisa është vepra me këtë kualifikim nuk do ta kundërshtoj masën e paraburgimit. Unë e kam kundërshtuar dyshimin e bazuar lidhur me këto vepra dhe e kundërshtoj edhe tani por të shohim se si do të veprojë prokurorja”, ka thënë Tmava.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/hetimet-per-rastin-e-liqenit-te-badovcit-drejt-fundit-video/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala