Haliti: Nuk do të rrihemi të hënën në Kuvend

Autori:Avdyl Pajaziti

Nënkryetari i Kuvendit, Xhavit Haliti beson se seanca e së hënës do të mbahet. Haliti tha se deputetët nuk do të rrihen mes vete më 2 nëntor.

“Unë besoj që do të kemi seancë, sepse është thirrur seanca. Ne do ta mbajmë seancën dhe në qoftë se na pamundësohet, normalisht që nuk e kemi ndërmend që si kolegë që jemi të rrihemi mes vete. Po besoj që nuk kemi ardhur në këtë pikë,” tha Haliti.

I pyetur se nëse do të pengohet sërish zhvillimi i seancës parlamentare a do të shfrytëzohet salla e improvizuar, Haliti ka thënë se kanë alternativa të ligjshme.

“Tani unë nuk jam ai që i vendosi këto çështje, kemi alternativa të ligjshme për të vepruar. Unë nuk mund të them as për, as kundër, sepse ky është vendim i Kryesisë,” deklaroi ai.

I dyti i Kuvendit tha se për ratifikimin e Marrëveshjes së Stabilizim-Asociimit duhet të mbahet një seancë e veçantë.

“Ratifikimi i kësaj marrëveshjeje bëhet me 2/3 e votave të deputetëve. Besoj që edhe opozita është dakord që të marrë pjesë në një seancë ku ratifikohet Marrëveshja e MSA-së. Besoj që edhe pozita, në këtë rast organet përkatëse të parlamentit, do të duhet të shqyrtonin mundësinë që të bëhet një seancë e veçantë lidhur me Ratifikimin e Marrëveshjes së Stabilizim- Asociimit”, deklaroi ai.

Haliti tha se ai është pro që opozita të futet në seancë dhe të marrë pjesë në ratifikimin e MSA-së.

“Unë jam që ata të futen në sallë, të thonë fjalën e vet edhe kundër edhe pro kësaj marrëveshje dhe ne ta hedhim në votim dhe ta ratifikojmë. Besoj që shumica absolute e deputetëve do ta votojnë këtë”, pohoi Haliti.

Marrëveshja e Stabilizim-Asociimit mes Kosovës e BE-së u nënshkrua dje në Strasburg. /kallxo.com/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/haliti-nuk-do-te-rrihemi-te-henen-ne-kuvend/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala