Greva bllokon prodhimin e energjisë

Autori:Zekirja Shabani

Punëtorët e hidrocentralit të Ujmanit as të martën nuk e kanë ndërprerë grevën e filluar me 5 shkurt. Atyre nuk u janë plotësuar kërkesat dhe për pasojë ky hidrocentral nuk po prodhon energji elektrike.

Përfaqësuesi i punëtorëve grevistë, Damljan Tomoviç, ka treguar se si pasojë e grevës së punëtorëve, nuk po prodhohet energjia elektrike në hidrocentral.

Ai thotë se Bordi i Ibër Lepencit po i injoron dhe nuk po ua përmbushë kushtet elementare për punë.
“Ne as uniforma nuk kemi, ndërsa anëtarët e Bordit e as Kryeshefi asnjëherë nuk kanë qenë këtu e as që dinë ku i bie Ujmani. Ne fillimisht jemi diskriminuar, ku 22 punëtorë i kemi nënshkruar kontratat e Kosovës që na i ka ofruar drejtori teknik, Arbnor Prekazi, ku më pas shteti serb na ka paditur në gjykata për këtë, ndërsa punëtorët tjerë që nuk i kanë nënshkruar kontratat kanë vazhduar të punojnë dhe t’i marrin rrogat sikurse ne”, thotë Tomoviç.

Ai dhe grevistët e tjerë këmbëngulin në shkarkimin anëtarëve të mbetur në Bordin e Ibër Lepencit, Faton Gjyshinca e Bajram Mustafa, Kryeshefit Ekzekutiv Demë Abazi dhe drejtorit teknik të Ujmanit, Predrag Bozhoviçit.

Ai thotë se janë pikërisht këta persona, që menaxhmentin e Ibër Lepencit e kanë penguar t’i përmbushë kërkesat elementare të tyre.

Grevistët kanë paralajmëruar radikalizmin e veprimeve të tyre, nëse Qeveria vazhdon të mos i përmbush kërkesat e tyre, të cilat i kanë dërguar në Zyrën e Kryeministrit Isa Mustafa dhe tek ministri i Ministrisë së Zhvillimit Ekonomik, Blerand Stavileci.

Mësohet që nëse vazhdon kjo situatë mund të vije edhe deri të ndërprerja e ujit i cili furnizon KEK-un, që do të kishte për pasojë pamundësinë e e KEK-ut për të prodhuar rrymë dhe rrjedhimisht edhe lënien e Kosovës në terr.

Ushtruesi i detyrës së Kryeshefit Ekzekutiv të “Ibër Lepencit”, Demë Abazi në një prononcim për Veriu.info thënë se ndërprerja e prodhimit të rrymës është për shkak të mungesës së tensionit për kyçjen e sistemit në largpërçues, e jo npër shkak të grevës.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/greva-bllokon-prodhimin-e-energjise/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala