Gjykata e Apelit lë pa mandat dy deputetët e PDK-së

Autori:Avdyl Pajaziti

Partia Demokratike e Kosovës momentalisht është pa dy deputetë në Kuvend. Latif Gashi, i njohur me nofkën “Lata” dhe Rrustem Mustafa, i njohur me nofkën “Remi”, me automatizëm kanë humbur mandatin e deputetit, kur Gjykata e Apelit e ka vërtetuar aktgjykimin e shkallës së parë dhe ka lëshuar aktgjykim të formës së prerë.

Sipas Kodit të Procedurës Penale, neni 488, pika 2, aktvendimi merr formën e prerë dhe ekzekutohet kur ndaj tij më nuk mund të ushtrohet ankesë ose kur nuk lejohet ankesë.

E vetmja formë që tani mbrojtja e të dënuarve për krime lufte ka thënë se do të përdorë është ajo e mbrojtjes së ligjshmërisë, që është mjet i jashtëzakonshëm dhe jo ankesë, raporton KTV.

Po sipas Kodit të Procedurës Penale, në rastet penale, aktgjykim i formës së prerë konsiderohet aktgjykimi i nxjerrë nga Gjykata e shkallës së dytë, ajo e Apelit.

E vetmja mundësi kur mund të parashtrohet ankesë ndaj aktgjykimit të Gjykatës së Apelit është nëse kjo gjykatë e ndryshon aktgjykimin lirues të themelores dhe e zëvendëson me aktgjykim dënues ose kur me aktgjykim është shqiptuar burgim i përjetshëm, mundësi që nuk kanë të bëjnë me rastin e dy deputetëve të Kuvendit.

Sipas nenit 8, pika 1.6 e Ligjit për të drejtat dhe përgjegjësitë e deputetit, ky humb mandatin me vendim të formës së prerë të gjykatës, kur dënohet për vepër penale me burgim për 1 ose më shumë vjet.

Të njëjtën e parasheh edhe Rregullorja e punës së Kuvendit.

Latif Gashi është dënuar me 6 vjet burgim, ndërkaq Rrustem Mustafa me 4 vjet burgim për krime lufte në të njohurin si Grupi i Llapit, proces që ka nisur në vitin 2002.

KohaVisioni ka kontaktuar me kabinetin e kryetarit të Kuvendit, Kadri Veseli, të cilët kanë thënë se ata ende nuk kanë pranuar asnjë shkresë nga Gjykata.

Vendimi nga Gjykata e Apelit është marrë në muajin gusht, ndërkaq është bërë publik të premten e kaluar.

Në Gjykatën Themelore, e cila është e autorizuar për ekzekutim të vendimit, nuk kanë dashur të flasin, me arsyetimin se përgjegjës është EULEX-i.

Latif Gashi dhe Rrustem Mustafa, deputetë të PDK-së, sipas platformës Vota Ime, asnjëherë nuk kanë bërë asnjë pyetje parlamentare në këtë mandat të Kuvendit të Kosovës.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/gjykata-e-apelit-le-pa-mandat-dy-deputetet-e-pdk-se/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala