Fundi i AKP-së

Autori:Zekirja Shabani

Qeveria e Kosovës së shpejti pritet të dërgojë në Kuvend ligjin, i cili parasheh mbylljen e Agjencisë Kosovare të Privatizimit dhe përmbylljen e procesit të privatizimit të ndërmarrjeve shoqërore, ka bërë të ditur për Radion Evropa e Lirë, ministri i Financave, Avdullah Hoti.

Ai ka thënë se ky ligj do të përcaktojë kohën se kur do të përfundojë procesi i privatizimit.

“Ky ligj do të përcaktojë një afat kohor 2-vjeçar apo 3-vjeçar, për aq sa do të jetë e nevojshme, por do ta dimë saktë vitin se kur do të mbyllet AKP-ja. Ato ndërmarrje që janë në privatizim, duhet të privatizohen, e ato që nuk ka interesim t’i privatizojë dikush, duhet të shkojnë në proces të rregullt të likuidimit”, ka bërë të ditur Hoti.

Sipas tij, mjetet që janë mbledhur në fondin e privatizimit duhet të lirohen pas përfundimit të këtyre proceseve dhe të përdoren për strategjinë zhvillimore të Kosovës, strategji kjo që paraqet zhvillimin ekonomik të vendit.

Hoti ka theksuar se Dhoma e Veçantë e Gjykatës Supreme duhet të jetë të jetë shumë më efikase për të trajtuar kërkesat e kreditorëve potencialë ndaj atyre ndërmarrjeve që janë privatizuar, ose që janë në proces të privatizimit.

“Derisa nuk pastrohet kjo çështje, është vështirë të përdoren këto fonde”, ka theksuar Hoti.

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/fundi-i-akp-se/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala