FSK mposht shtetet anëtare të NATO-s

Autori:Avdyl Pajaziti

Në bazën Ushtarake të KFOR-it “Village Italia” në Pejë, në organizim të Kontingjentit të KFOR-it Slloven, të premten është mbajtur gara tradicionale ushtarake “SYNCON 31 CHALLENGE”, në të cilën morën pjesë 14 ekipe ushtarake; shtatë prej tyre ishin nga shtetet anëtare të NATO-s, si: SHBA, Italia, Sllovenia, Polonia, Portugalia, Austria, ekipe nga EULEX-i, kurse FSK-në e përfaqësoi ekipi i Batalionit të Dytë të Brigadës për Reagim të Shpejtë, me ftesë të KFOR-it Slloven.

Qëllimi i mbajtjes së kësaj gare mjaft sfiduese, ishte ngritja e aftësisë profesionale në aspektin individual dhe atë ekipor-kolektiv.

Ekipet pjesëmarrëse në garë është dashtë t’i kalojnë shumë disiplina, si: poligonin luftarak, navigimin, marshimin sfidues, qitje me armë, evakuimi i viktimave dhe tërheqja e automjetit me litar.

“Ekipi i FSK-së, në të gjitha stacionet trajnuese ka treguar rezultate të shkëlqyeshme duke dalë fitues në çdo disiplinë”, thuhet në njoftimin për media të Ministrisë së FSK-së.

Në njoftim theksohet gjithashtu se nga organizatorët është vlerësuar lartë performanca e ekipit të FSK-së, të cilët kanë punuar si trupë e përbashkët dhe falë këtij angazhimi kanë arritur rezultate të larta në të gjitha disiplinat.

Në ceremoninë përmbyllëse mori pjesë edhe zëvendëskomandanti i Komandës së Forcave Tokësore (KFT), Gjeneral brigade Gëzim Hazrolli i cili vlerësoi lartë organizimin e kësaj gare, si dhe përgëzoi ekipin e FSK-së, duke shpreh gatishmërinë dhe angazhimin e tij për përkrahjen dhe mbështetjen e pakursyer në çdo organizim të tillë.

Gjeneral Hazrolli falënderoi edhe komandantin e Kontingjentit ushtarak të KFOR-it Slloven, nënkolonelin Boshtjan Moçnik dhe komandantin e Kampit “Village Italia”, Kolonelin Ciro Forte, për bashkëpunimin dhe mbështetjen e vazhdueshëm që janë duke dhënë për FSK-në.

Ndërsa, nënkoloneli Boshtjan Moçnik, KFOR-i slloven, përgëzoi ekipin e FSK-së për paraqitjen e shkëlqyeshme dhe angazhimin ekipor dhe individual.

Kjo garë organizohet çdo vit nga KFOR-i dhe ka karakter sfidues, në të cilën këtë vit, me ftesë të KFOR-it slloven, mori pjesë edhe një ekip i Forcës së Sigurisë së Kosovës.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/fsk-mposht-shtetet-anetare-te-nato-s/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala